Home » Lajme » Mesiq i ka quajtur iluzionistë ata që mendojnë se do të ketë ndërrim të kufijve në Ballkan

Mesiq i ka quajtur iluzionistë ata që mendojnë se do të ketë ndërrim të kufijve në Ballkan

Ish-presidenti i Republikës së Kroacisë, Stjepan Mesiq, i ka quajtur iluzionistë ata që mendojnë se do të ketë ndërrim të kufijve në Ballkan. Ai ka deklaruar se Serbia nuk është e detyruar ta njohë Kosovën, por e rëndësishme është qarkullimi i lirshëm i njerëzve dhe mallrave. Mesiq këto komente i bëri sot pas një takimi që ka zhvilluar me zëvendëskryeministrin Hajredin Kuçi, ndërsa ky i fundit nuk ka dhënë ndonjë deklaratë për media pas takimit. Ish-presidenti kroat, i cili është i njohur për deklarimet e tij në përkrahje të pavarësisë së Kosovës, gjatë një vizite që po zhvillon në Kosovë, ka komentuar edhe zhvillimet e fundit që kanë ndodhur me arritjen e marrëveshjes së Kosovës për përfaqësim rajonal. Ai këtë e ka quajtur një hap përpara, në mënyrë që të ketë qarkullim të lirshëm të njerëzve dhe mallrave. “Unë mendoj se ky është hapi i parë, e hapat tjerë do të vazhdojnë pas tij. Serbia nuk është e detyruar që ta njoh Kosovën, por Serbia duhet ta bëjë të mundur që rajoni të funksionojë, pra qytetarët të mos kenë pengesa në kufij dhe po ashtu mallrat mos të pengohen. Në këtë mënyrë rajoni të funksionon në të gjitha aspektet”, ka theksuar Mesiq. Ndërsa në lidhje me atë që mund të ketë ndryshime të kufijve në Ballkan, Mesiq këta politikanë i ka quajtur iluzionistë. Mesiq i pyetur për veriun e Kosovës, ai këtë e ka ndërlidhur me rastin e okupimit të një pjese të Kroacisë nga serbët. “Ne kemi reaguar në mënyra të ndryshme. Së pari kemi tentuar të reagojmë kur një çerek i Kroacisë ka qenë i okupuar, që e tëra të zgjidhet përmes dialogut, por pasi që kjo nuk rezultoi me sukses, kemi ndërmarr aksione ushtarake, por ka mbetur një pjesë e okupuar, të cilin problem e kemi zgjidhur përmes dialogut”, tha Mesiq, transmeton Kosovapress. Ai ka shtuar se këto bisedime kanë qenë shumë të sukseshme, pasi problemi është zgjidhur pa gjakderdhje, duke shtuar se edhe këtu do të jetë njëjtë. Ish-presidenti kroat ka zhvilluar një takim edhe me kryeparlamentarin, Jakup Krasniqi.
RTV Presheva

Leave a Reply

You must be Logged in to post comment.

© 2020 KosovaLindore · RSS · Designed by Theme Junkie · Powered by WordPress
ShqipEnglishDeutsch