Home » Lajme, Ndërkombëtare » MOGHERINI: DITËN QË HIQET TAKSA, DO TË THËRRAS TAKIMIN E RI PËR DIALOG

MOGHERINI: DITËN QË HIQET TAKSA, DO TË THËRRAS TAKIMIN E RI PËR DIALOG

Përfaqësuesja e lartë e Bashkimit Europian për Politikën e Jashtme dhe Sigurinë, Federica Mogherini përsëriti nga selia e Kombeve të Bashkuara në Nju Jork, ku ndodhej për një seancë raportimi përpara Këshillit të Sigurimit, thirrjet drejtuar Kosovës për heqjen e taksës 100% ndaj produkteve me origjinë nga Serbia.

Në fjalimin e saj të gjatë, ku foli mbi kontributet e Bashkimit Europian në sistemin shumëpalësh, Mogherini u ndal edhe në disa zhvillime të rëndësishme të rajonit tonë, duke veçuar ndihmesën e unionit për pajtimin mes vendeve të Ballkanit.

“Më lejoni të falënderoj secilin prej jush për qasjen konstruktive të anëtarëve të Këshillit të Sigurimit ndaj dialogut mes Beogradit dhe Prishtinës. Për rifillimin e plotë të bisedimeve, tarifat e vendosura nga qeveria e Kosovës ndaj produkteve serbe duhet hequr. Ditën kur kjo do të ndodhë, do të thërras menjëherë një takim të ri për dialogun, në mënyrë që të arrihet një marrëveshje ligjërisht e detyrueshme, e cila do të adresojë të gjitha çështjet e jashtëzakonshme dhe do të sjellin normalizimin e plotë të marrëdhënieve mes Prishtinës dhe Beogradit”, tha Mogherini.

Ajo përmendi më tej rolin e saj si ndërmjetësuese e dialogut, por u kujdes të theksonte se dialogu vet nuk i përkiste asaj, as Bashkimit Europian apo ndonjërit përreth tryezës së Këshillit të Sigurimit, por iu përket më së shumti palëve diskutuese.

“Ndaj, është në dorën e tyre gjetja e një marrëveshjeje që do të ishte e pranueshme dhe e përshtatshme për të dyja palët. Njëkohësisht, marrëveshja përfundimtare duhet të jetë në përputhje me ligjin ndërkombëtar dhe duhet të ketë mbështetjen e Këshillit të Sigurimit të OKB-së”, tha Mogherini.

Duke theksuar se roli i palëve është dhe do të jetë vendimtar, shefja e politikës së Jashtme të BE-së shprehu gatishmërinë për të intensifikuar shkëmbimet me të gjithë anëtarët e Këshillit të Sigurimit në OKB mbi këtë çështje.

Në fund, ajo u ndal edhe te ngjarja historike që ndodhi këtë vit, sërish në Ballkan. “Marrëveshja e Prespës është një tjetër shembull pozitiv i bashkëpunimit BE-OKB dhe një shembull i mrekullueshëm i lidershipit politik të të dyja vendeve, Maqedonisë së Veriut dhe Greqisë”, tha ajo, raporton Indeksonline.

Leave a Reply

You must be Logged in to post comment.

© 2019 KosovaLindore · RSS · Designed by Theme Junkie · Powered by WordPress
ShqipEnglishDeutsch