Subjektet politike dhe institucionale kanë reaguar ndaj dënimit me 116 vite burgim të shqiptarëve të Luginës së Preshevës, duke i quajtur këto dënime makabre dhe skenare të kohës së Millosheviqit. Ata kërkojn që 11 shqiptarët e komunës së Preshevës të lirohen menjëherë .Ky dënim i shqiptuar nga Gjykata e Lartë për Krime të Luftës në Beograd, subjektet në fjalë e vlerësojn si destabilizues dhe me qëllimin e vetëm, frikësimin e shqiptarëve.
——————–
Kryetari I LKSH Orhan Rexhepi pas vendimit të djeshëm ka reaguar sot duke dëshmuar për çdo gjë që është bërë për këto vite me shqiptarët e Luginës nga gjykata speciale për krime lufte. Sipas tij edhe vendimi I parë me 101 vjet burg ka qenë vendim politik edhe përkundër asaj se më 21 janar ishin sjellë 224 dokumente që argumentonin pafajësinë e djemve tanë. Gjykata e apelit pas vendimit për rigjykim kishte argumentuar se gjykimi I parë ishte bërë pa argumente dhe një ndër sugjerimet e saj ka qenë se nuk mund te konsiderohen krime lufte aktet e kryera pas përfundimit të luftës.

Sipas Rexhepit në seancën e djeshme vetëm se është rilexuar aktakuza e 25 qershorit , duke hedh poshtë bozhur 50 dhe në vend të tij duke marrë për bazë dëshmitar romë me inicialet c1 dhe c2. Sipas Orhan Rexhepit I cili nga dita e parë ka përcjellë të gjitha ngjarjet me të arrestuarit shqiptar ,dje 95 % të dëshmitarëve kanë dëshmuar për pafajësinë e të dënuarve shqiptarë. Në fund kreu I LKSh ka lëshuar akuza edhe për politikanët në Luginë të cilët nuk kanë marrë pjesë në seancën e djeshme të gjykimit

——————–
Aleanca për Ardhmërinë e Kosovës përcjellë indinjatën e thellë ndaj vendimit të Gjykatës Supreme të Serbisë, sipas të cilit u dënuan me 116 vjet burg 11 shqiptarë të pafajshëm të Luginës së Preshevës, me pretekstin e shpifur “për krime të luftës”. “Ky është një akt i radhës të qeverisë së Beogradit, në kuadër të trysnisë së vazhdueshme dhe të terrorit sistematik që ajo e ka ushtruar dhe vazhdon ta ushtrojë kundër popullsisë shqiptare që jeton në trojet e veta në Luginë të Preshevës”, thuhet në nëj reagim të AAK-së. AAK e konsideron këtë vendim krejtësisht politik, të padrejtë dhe në funksion të destabilizimit dhe ngritjes së tensioneve, aq më shumë tash në kohën kur flitet për nisjen e bisedimeve midis dy shteteve. Ky vendim, i marrë sipas metodave të dikurshme të regjimit famëkeq të Millosheviqit, është një provokim i rëndë dhe i drejtpërdrejtë ndaj popullsisë shqiptare në Luginë të Preshevës dhe e rëndon klimën dhe disponimin politik për angazhime në vendosjen e raporteve të mira dhe të bashkëpunimit midis dy vendeve. AAK fton mekanizmat kompetentë ndërkombëtarë që të ndërhyjnë sa më parë në shfuqizimin e këtij vendimi dhe në lirimin e 11 shqiptarëve të pafajshëm, në ndaljen e dhunës dhe të trysnisë shtetrore të Beogradit mbi shqiptarët e asaj ane, të cilët edhe sot po bijnë viktimë e politikës trashëguese të regjimit serb të shekullit të kaluar.
———————
Ahmet Iusfi tha se me këto gjykime Serbia po mundohet ta frikësojë dhe zbraz popullatën e Kosovës Lindore. Ish komandanti i UÇK-së për Zonën e Karadakut Ahmet Isufi dhe Ahmet Daku nga shoqata e veteranëve të luftës në Gjilan e kanë quajtur gjykim të motivuar politikisht , vendimin Gjykatës së Beogradit në rastin e grupit të Gjilanit. Ahmet Isufi tha se faktori ndërkombëtar dhe ai vendor duhet të bëjnë çmos që ta lirojnë nga të gjitha akuzat Grupin e Gjilanit. “Me këtë vendim Serbia është treguar se nuk është shtet ligjor dhe se i mungon demokracia” tha Isufi. Sipas ish komandantit të Zonës së Karadakut të UÇK-së me këto gjykime Serbia tenton të nxisë frikë dhe pasiguri tek popullata e Kosovës Lindore. “Këto gjykime synim e kanë zbrazjen e popullatës së Luginës së Preshevës nga trojet e veta “tha Isufi. Isufi ka kritikuar institucionet kosovare dhe Qeverinë se asgjë nuk po bëjnë për të ndihmuar dhe mbështetur popullatën e Kosovës Lindore. Edhe Ahmet Daku nga shoqata e veteranëve të luftës në Gjilan tha se Serbia në vend se t`i dënojë kryesit e krimeve që i ka në shtetin e vet e që dihen me emra e mbiemra, po i dënon padrejtësisht viktimat. “Në Gjilan janë mbi 100 persona të vdekur dhe asnjë serb nuk është dënuar. Ky vendim është politikë dhe i bazuar në shpifje e trillime të kuzhinave të Beogradit “ tha Daku
—————-
Aksioni humanitar ‘ Bëhu edhe ti dhurues gjaku’ i organizuar nga Kryqi i Kuq lokal në Preshevë është mbajtur në hollin e Shtëpisë së Kulturës në Preshevë. Sekretari i Kryqit të Kuq Ahmet Halimi thekson se interesimi i qytetarëve për dhurimin e gjakut ishte mjaft i madh, madje gjatë ditës së sotme janë grumbulluar 12 litra gjak.

Aktiviteti në fjalë është zhvilluar sot nga ora dhjetë e mëngjesit.

Procedura e dhurimit të gjakut ishte plotësimi i pyetësorit, kontrollimi mjekësor si dhe dhënia e gjakut që zgjat prej 5 minutash.

Dhurues të gjakut mund të jenë gjithë persona e shëndoshë të moshës 18 deri 65 vjeç. Për dhuruesit vullnetar të gjakut është përkujdesur ekipi i specializuar mjekësor nga shërbimi i transfuzionit të gjakut në qendrën spitalore në Vranjë. Gjaku i grumbulluar nga dhuruesit vullnetar do të shfrytëzohet për nevojat e qytetarëve të komunës sonë madje ruhet në kushte të specializuara në shërbimin e gjakut në spitalin e Vranjës, shprehet kështu për radiotelevizionin Presheva sekretari kësaj organizate. Ky aktivitet humanitar ndërmerret dy herë brenda vitit herën e fundit është mbajtur në muajin dhjetor të vitit të kaluar, ka potencuar zoti Halimi .

——————–

Kryetari i komunës së Preshevës Ragmi Mustafa po merr pjesë në konferencën e madhe ballkanike që përfshin një numër të konsiderueshëm të komunave të organizuar në Turqi. Kemi pasur fatin që komunat Preshevë e Bujanoc dhe një komunë e Sanxhakut të Novi Pazarit nga Serbia të jemi pjesë e kësaj konference të madhe ballkanike shprehet kështu Kryetari i Komunës Ragmi Mustafa. Pjesëmarrëse në këtë konferencë do të jenë edhe komuna të tjera nga Kosova, Maqedonia dhe Bullgaria dhe rrjeti i komunave të asociacionit të përbashkët në territorin e Republikës së Turqisë. Konferenca në fjalë është disa ditore ndërsa do të shtjellohen tema të ndryshme në lidhje me menaxhimin e komunave, buxheteve, në fushën e arsimit dhe teknologjisë së re informative e implementimin të saj. Konferenca do të jetë e karakterit të bashkëpunimit ndërmjet komunave në pjesën e Ballkanit Perëndimor. Sipas Kryetarit të komunës së Preshevës kemi përgatitur edhe materiale propaganduese që përshkruajnë pasqyrën e komunës nëpër kopje elektronike dhe të shkruara.

———

Policia e Vranjës ka ngritur padi në gjyqin e Vranjës kundër Dejan M (27) nga Leskoca për shkak të dyshimit se ka kryer vepër penale për kalim të paligjshëm të kufirit dhe trafikim të njerëzve. Policia dyshon se Dejan M me 16 shtator të këtij viti në Preshevë, ka pranuar dy shtetas, njërin nga Siria dhe tjetrin nga Nigeria duke i vendosur ata në veturën e tij me qëllim që ti transportojë deri në Beograd, ku dhe e ka parandaluar policia
——————

Ka ndërruar jetë Kamber Imeri. Kamber Imeri u lind më 1942 në fshatin Miratoc. Shkollën fillore e kreu në fshatin e tij, kurse shkollën e mesme ekonomike në Prishtinë. Ka qenë student i fakultetit juridik në Prishtinë, të cilin për shkak të kushteve ekonomike nuk mundi të përfundojë. Ka punuar në bibliotekën e fshatit Miratoc dhe tri vite si arsimtarë në shkollën fillore Abdulla Krashnica në Miratoc. Ndërsa nga prilli i vitit 1978 punoi në Bashkësinë Vetëqeverisëse të Interesit për Shëndetësi në Preshevë deri më 1989. Kohën e fundit jetoi dhe punoi në Belgjikë. Ka botuar përmbledhjet me poezi Vallet e qyqeve, Kolltuku me gjemba dhe Rrëfime nga fshati 1, 2, 3. Sipas familjarëve varrimi i të ndjerit bëhet nesër.
RTV Presheva