Albin Kurti i përgjigjet Escobarit: Çështja e Asociacionit, tek pas njohjes
Kryeministri i vendit, Albin Kurti, ka komentuar deklarimet e emisarit të Shteteve të Bashkuara të Amerikës, Gabriel Escobar, se Asociacioni nuk është çështje për të cilën vendos një person pasi sipas tij është një marrëveshje dhe obligim ndërkombëtar për të cilën ka rënë dakord Kosova. Këto komente Kurti i bëri në një intervistë për televizionin turk TRT.
Kreu i ekzekutivit, Albin Kurti, në televizionin publik turk, TRT ka folur për Asociacionin duke përfshirë edhe deklarimet e emisarit të SHBA-së për dialogun, Gabriel Escobar.
Kurti tha se përfshirja e Escobar në këtë proces është shumë e madhe, mirëpo sipas tij duhet qenë fer dhe të kujdesshëm.
“Nëse Serbia është ithtare e asociacioneve ajo do të duhej ta bënte edhe në vendin e saj sepse në Serbi 20 për qind e popullsisë janë minoritete. Z. Escobar është shumë aktiv dhe shumë i përfshirë dhe unë e mirëpres këtë. Ne duhet të jemi të kujdesshëm dhe fer. Dhe, ajo për çfarë unë kam thënë për Asociacionin janë qëndrime të mijat, nuk janë gjykime personale. Vullneti i popullit të Kosovës, kushtetutshmëria dhe ligjshmëria, janë gjërat që mua më bënë të them se së pari të them që njëherë njohja e ndërsjellë, dhe vetëm më pastaj të ketë ndonjë lloj Asociacioni”, ka thënë Kurti .
Kreu i qeverisë, Albin Kurti, duke folur për asociacionin e kujtoi atë se çfarë ka ndodhur në Bosnjë dhe Hercegovinë, krijimi i Republikës Serbe.
