DASH kërkon lirimin e policëve të Kosovës të kidnapuar nga autoritetet serbe
Departamenti Amerikan i Shtetit(DASh) ka kërkuar lirimin e tre policëve kosovarë të kidnapuar nga autoritetet serbe brenda territorit të Kosovës.
Reagimi ka ardhur një ditë pas ngjarjes përmes zëdhënësit, Matthew Miller.
“Ne besojmë se si Kosova dhe Serbia duhet të marrin hapa të menjëhershëm për të çtensionuar situatën dhe kjo përfshin lirimin pa kushte të tre oficerëve të policisë së Kosovës që u ndaluan së fundmi”, u ka thënë gazetarëve zëdhënësi i Departamentit të Shtetit, Matthew Miller.
Sipas tij, të dyja palët duhet të ndjekin planin prej tre pikash që ka paraqitur BE-ja.
“Si pjesë e kësaj Kryeministri Kurti duhet të garantojë që kryetarët e zgjedhur të kryejnë detyrat e tyre nga vend-ndodhje alternative dhe të tërheqë forcat e policisë”, ka thënë Miller.
Ai ka theksuar seSHBA dënon dhunën ndaj forcave të KFOR-it, anëtarëve të zbatimit të ligjit dhe gazetarëve. “Përsa i takon rrugës më tej ne vazhdojmë të angazhohemi si drejtpërdrejt me të dyja palët, dhe me partnerët në rajon”, është shprehur zëdhënësi i DASh.
Ai nuk ka dashur të flasë për masa të mundshme në këtë moment. ” Fokusi ynë është që t’u bëjmë të qarta palëve pritshmëritë tona, që të dyja palët të marrin masa për të lehtësuar tensionet dhe të ndjekin planin me tre pika të paraqitur nga BE-ja”, ka thënë Miller.
