Donika Gërvalla: Ky rajon mjaft e ka një Republikë Serbe, s’ka nevojë për një të dytë

Read Time:1 Minute, 15 Second

Ministrja e Punëve të Jashtme dhe Diasporës, Donika Gërvalla, është deklaruar për media pas takimit që ka pasur me homologun kroat, Gordan Grliq Radman.

Gërvalla theksoi se kanë shqyrtuar modelin e Kroacisë për trajtimin e komuniteteve, duke theksuar se presin nga serbët të jenë më seriozë në procesin e dialogut dhe se presin nga BE-ja që të ketë më shumë këmbëngulje në vendimet që merren në praninë e tyre.

“Ne kemi trajtuar modelin e kemi parë, asnjë lloj asociacioni, mekanizimi nuk mund të implementohet në Kosovë nëse shkel Kushtetutën tonë dhe shkel funksionimin e shtetit tonë. Çfarë kemi parë në Bosnjë dhe Hercegovinë me serbët nuk mund të ndodhë këtu. Ky rajon mjaft e ka një Republikë Serbe, nuk ka nevojë për një të dytë. Të gjitha modelet që kemi parë, kemi konstatuar se Kushtetua e Kosovës u jep shumë më shumë të drejta komuniteteve”, tha ministrja.

Ministrja po ashtu deklaroi se me homologun kanë biseduar për perspektivën evropiane të Kosovës për anëtarësim në Bashkimin Evropian.

“U pajtuam që është një proces që ka zgjatur padrejtësisht shumë, por që më në fund qytetarët do të mundë të udhëtojnë pa viza në janar 2024. E falënderova për mbështetjen që Kroacia i ka dhënë Kosovës që nga dita e parë për aplikimin në Këshillin e Evropës. Biseduam për perspektivën evropiane të Kosovës për anëtarësimin në BE për aplikimin e që ka filluar të marrë formë. Biseduam gjithashtu edhe për konsultimeve politike që do t’i kemi pas disa javësh”.