Home » Kulturë, Lajme » DY FJALË PËR LIBRIN PËR PLISIN E BARDHË DHE AUTORIN E TIJ, AGRON GJEDIA

DY FJALË PËR LIBRIN PËR PLISIN E BARDHË DHE AUTORIN E TIJ, AGRON GJEDIA

Nga Ramiz LUSHAJ

E diela e fundit e gushtit 2018 do të festohet me veprimtari tradite në Parkun Kombëtar të Dajtit. Shenjohet 15 vjetori i Festës së Bytyçit, organizuar nga Shoqata Mbarëkombëtare “Bytyçi”, Tiranë-Prizren, e cila është një nga ma krye/shquarat ndër simotrat e saj të Shoqërisë Civile gjithkahit ku flitet Shqip, ndër Shqiptarí. Kryetari i saj, prej nga themelia, është av. Agron Isa Gjedia, me hapa përkushtimor, të urtë, dritënor dhe punëra të mira e të larta me Shoqatën panshqiptare të Bytyçit e të bytyçasve. Ndaj, mendoj, se ka ardh’ dita që kjo Shoqatë e Klasit të Parë, po dhe kryetari i saj – një qytetar e veprimtar i réndit të parë, të vlerësohen me dekoratë apo titull nderi nga Presidenti i Shqipërisë e, pse jo, dhe nga Presidenti i Kosovës.

Nja 7 vite ma herët, e diela e 28 gushtit 2011, sigurisht, patjetër, do të hynte natyrshëm në histori, do të bante realisht historinë e vet duke marrë emër e lartësime gjithkund ndër shtete e treva etnike dhe diasporat shqiptare. “Festa e Bytyçit e Bytyçave”, kjo veprimtari tradicionale, prej kësaj date u thirr ndryshe dhe “Festa e Plisit të Bardhë” dhe, aty, atë ditë, u ndërmor nisma për ta kthye në një Festë Mbarëkombëtare Shqiptare. Shoqata “Bytyçi” e kryetari i saj, av. Agron Isa Gjedia, ishin të parët e kësaj nisme dhe në ballë të saj prej atëherit e deri më sot. Edhe nesër. E, fill pas Bytyçit në Dajt, bash në kryeqytetin historik dardan, në Shkup (Maqedoni), në Ditën e përvjetorit të Pavarësisë së Kosovës, më 17 shkurt 2012, Lëvizja “Zgjohu” e organizoi veprimtarinë solemne e festive “Dita e Plisit”. Po këtë vit, në prag të Ditës së Flamurit Kombëtar Shqiptar, më 25 nëntor 2012, në Nju Jork të Amerikës, Fondacioni i atyshëm i Plavë-Gucisë (me nismë e mbështetje të biznesmenit Bruno Selimaj e vllait të tij, Alex Selimaj, kryetar i asokoshëm i FPG) e organizuan “Ditën e Plisit” në Amerikë.Mbasandejna, në 2014 e në vazhdimësi, pati veprimtari “Dita e Plisit” në vende e kulla historike të Kosovës, si në Klinë, Junik, Drenicë, etj., të cilët kanë për kryenismëtarë e organizatorë atdhetarët: Ismet Krasniqi – Lala e Prend Buzhala. Tashti, tradita e Festës së Plisit të Bardhë ka marr’ udhë për mirë gjithkahit, gjithkund.

Merita i takon të parit, Shoqatës Mbarëkombëtare “Bytyçi”, Tiranë-Prizren, po këta si Shoqatë e me kryetarin e tyre z. Gjedia, mbeten gjithnji meritorë, sepse ka 7 vite që e mbajnë të ndezur flakadan Festën e Plisit të Bardhë në Dajt, e këto vitet e fundit tek Teleferiku e “Ballkoni i Dajtit” i të ndjerit, dr. Muhamet Malo – Nderi i Kombit, Njeri i Mirë, biznesmen filantropist e të pasardhësve të tij, Migena Malo e Enklajd Malo.
Ka 7 vite që Shoqata “Bytyçi” dhe Agron Isa Gjedia janë në ballë të kësaj nisme, në krye të kësaj veprimtarie,vetveprues, bashkëpunues e bashkrendues me të tjerët. Sikur asgja ma tepër e ma shumë mos të kishin bá Shoqata Mbarëkombëtare “Bytyçi” e Agron Isa Gjedia veç këtë Festë të Plisit të Bardhë me veprimtari të shumanshme ka bá mjaft e mirë për t’u vlerësue e nderue nga të vetët e të tjerët, nga koha e historia shqiptare.

Agron Isa Gjedia, ky veprimtar elitar, para dy vitesh, më 2016, ishte nismtari e punëkryemi i Konkursit Kombëtar për Plisin e Bardhë, me kryeorganizator Poetekën Mbarëkombëtare “Ndue Bytyçi”– organizëm i Shoqatës Mbarëkombëtare “Bytyçi”, Tiranë-Prizren. Në konkurim e jashtë tij, morën pjesë gjithsej 85 poetë me 94 poezi, himn e poema për Plisin e Bardhë, ndër tá dhe vet Agron Isa Gjedia me poezinë “Fisi, Plisi e Lisi” (jashtë konkurimit), të cilën ia kushtimon babës së tij të mirë plisbardhë Isa Gurec Gjedia. Kjo flet dhe për atë “talentin e fshehur” të tij në të shkruarit poezi, pasi historia, kultura e natyra e Tropojës i ban të gjithë tropojanët të tillë, poetë. Sivjet, më 2018, në këto ditë gushti, në 15 vjetorin emblematik “Festës së Bytyçit”,

Shoqata “Bytyçi” e botoi dhe antologjinë poetike “Vargu i Plisit tim”, me redaktor poetin e njohur nga Çamëria, Namik Selmani dhe me financim të djalit e burrit të mirë bytyças, Alfred Shaban Lahuka, ushtarak i karierës, veprimtar i kohës, njeri model me virtytet e vlerat e tij. E thanun ndryshe, haptas: këtij Konkursi nuk do t’i vinte Ora e Konkurimit në malin e Dajtit dhe as Dita e Botimit në një antologji poetike në këtë 15 vjetor të Shoqatës, po të mos ishte Agron Isa Gjedia me përkujdesjet e tij në kohën, vendin e mënyrën e vet për t’i marrë e çuar deri në fund, për t’iu dalë në krye dhe nismave e aksioneve të tilla kulturore atdhetare.

Shoqata Mbarëkombëtare “Bytyçi”, Tiranë-Prizren, e ka “selinë e vet” tek çdo bytyças e bytyçase, të cilët janë “motorri” i saj, të cilët, me Kryesinë e Shoqatës e veprimtarët e saj bytyças e jo vetë bytyças, vetveprojnë si një ansambël i madh harmonik e frytdhënës.

E di se biznesmeni i shquar , Ram Geci i Bytyçit, pronari e drejtori i Përgjithshëm i Hotel Tirana International e i kompanisë së tij “Geci” gjithnjë e ka shfaq bujarinë e tij ndaj Shoqatës “Bytyçi”. Tjetra. Edhe në vitin 2015 ishte kontributor presidenti i Euro-Sig Kadri Morina në “Festën e Plisit të Bardhë” në Dajt. Them se ka dhe të tjerë, po nuk është koha e vendi të listnojë emra në vargni, pasi e kemi për objekt tematik Plisin e Bardhë e veprimtaritë rreth tij, kryetarin Agron Isa Gjedia e Shoqatën (e tij) “Bytyçi”, librin e tij “Plisi i Bardhë, Emblemë Hyjnore e Shqiptarisë”.

E, kur e cekëm se Shoqata Mbarëkombëtare“Bytyçi”,Tiranë-Prizren, funksionon e vetvepron si një “ansambël” veprimtarësh e vlerash, duhet theksue dhe fakti tjetër se ka dhe disa organizma të saj, që janë pjesë e saj, si Poeteka Mbarëkombëtare “Ndue Bytyçi” (i organizimit të konkurseve kombëtare), Forumi i Femrës Bytyçase (që e organizon çdo vit Festën e 8 Marsit, të titulluar së vomit dhe si Festimi i 8 Marsit Plisbardhë), etj. Gjithashtu, pranë kësaj Shoqate, vepron dhe një “Komitet” për ndarjen e çmimeve nga ma të ndryshmet, të shumta e të përvitshme, ku një ndër ta është dhe Çmimi “Plisi i Bardhë, Emblema Hyjnore e Shqiptarisë” (në tre klase: i parë, i dytë, i tretë), për çka fjalaflitet dhe në faqet 75-78 të këtij libri të autorit Agron Isa Gjedia.

Kryetari i Shoqatës “Bytyçi”, av. Agron Isa Gjedia, tashma e ka kaluar një gjysmë shekulli jetë. Prej 1 majit të sivjetëm po rrugëton kah 58-ta. Ai ka lindur në Çorraj të Bytyçit, në fisin e sojshëm, luftarak e kulturor të Bytyçit.

Fshati i tij bytyças, i njoftun ndryshe: Çorraj-Viliq ka disa personalitete të njohura, si biznesmeni i klasit të lartë Ram Geci (në 10 më të fuqishmit e Shqipërisë); ambasadori Islam Lauka – doktor i shkencave politike, studiues me disa monografi, pedagog universitar; vllaznit Bytyçi si Sejdi Bytyçi (disa grafika të të cilit e ilustrojnë dhe këtë libër për Plisin e Bardhë) e Sabit Bytyçi i “Vatrës” në Amerikë që kanë dhanë shumë për Kombin e vet Shqiptar; e të tjerë. Një ndër ta dhe Agron Isa Gjedia.

Njeri me katër diploma universitare: Agronomi në Universitetin Bujqësor të Tiranës; Juridik dhe Ekonomik në Universitetin e Tiranës; Histori-Gjeografi në Universitetin e Prishtinës (Shkolla e Lartë e Përgjithshme “Bajram Curri””, si dhe po ndjek studimet pasuniversitare të masterit në drejtësi, drejtimi kushtetues-administrativ. Ka dëshminë (çetifikatën) e avokatit të lëshuar nga Ministria e Drejtësisë (Tiranë, 1997) pas provimeve përkatëse. Krye Akademinë Diplomatike Shqiptare në Tiranë. Një kualifikim 6-mujor për Auditim, etj. Pra, njeri që e ndjek rrugën e dijes. Ia shton jetës e punës së tij të tillë “plisa” të dijes.

Av. Agron Isa Gjedia në fillimet e tij ka punue në ekonomitë bujqësore të Pacit e të Zogajve dhe në NB Fierzë në detyra të ndryshme; në disa firma private në Tropojë. Në dekadat e fundit ishte avokat në Tropojë, specialist në Zyrën e Punës në Tiranë; jurist në Prefekturën e Qarkut të Tiranës; jurist në komunën Bërzhitë të Tiranës, etj. Vitet e fundit avokat krejt në profesion të lirë, i liçensuar nga Ministria e Drejtësisë së Shqipërisë.

Av. Agron Isa Gjedia, përveçse kryetar i Shoqatës Mbarëkombëtare “Bytyçi”, Tiranë-Prizren, është dhe President i Poetekës Mbarëkombëtare “Ndye Bytyçi”; Kryetar i Shoqatës së Juristëve të Prefekturave dhe Njësive të Qeverisjes Vendore të Shqipërisë; kryetar i degës së Shoqatës së Miqësisë Shqipëri-Gjermani (për Tropojë), etj.
Av. Agron Isa Gjedia vjen me librin e tij të parë “Plisi i Bardhë, Emblema Hyjnore e Shqiptarisë”, pas një përvoje të gjatë si botues, si bashkautor në disa botime tematike e antologjike me studime, artikuj e krijime të tij, si në Tiranë, Prishtinë, Preshevë, Prizren, etj. si në botimin tematik “Dita e Plisit” (Vëllimi i dytë, i tretë, i katërt) përgaditur nga Ismet Krasniqi e Prend Buzhala, botuar në Prishtinë; monografia “Kryezinjtë e Gjakovës” i Mitat Q. Begollit (me një shkrim të tij) botuar në Prishtinë, 2013; “Dasmat Shqiptare në Preshevë dhe rrethinë, dikur dhe sot” (me një studim të tij), botue në Preshevë; në librin me përmbledhje të Sesionit Shkencor të Shkodrës (me një kumtim të tij), botue në Prizren; me parathanie e pasthanie dhe një poezi të tij te antologjia poetike tematike “Plisi i vargut tim” (Tiranë, 2018) si dhe në disa botime të tjera të kohëpaskohshme.
Njëherash, dhe botues i gazetës periodike “Bytyçi” (prej vitesh) dhe i asaj “Zëri i Malësisë së Gjakovës” (numër i vetëm).

Gjithashtu, ka mbajt referate e kumtuesa në disa konferenca, simpoziume e sesione shkencore në Shqipëri, Kosovë, Luginën e Preshevës, si dhe ka botue shpesh, ndër vite e dekada, shkrime të ndryshme në gazeta, revista e portale si në Tropojë, Tiranë, Kosovë, Maqedoni, Zvicër, SHBA, Mbretëri të Bashkuar, etj.

Libri i tij “Plisi i Bardhë, Emblemë Hyjnore e Shqiptarisë” (Parashtresa, trajtesa, vështrime) është i pari në udhën e tij të botimeve, që daton në 15 vjetorin e Shoqatës Mbarëkombëtare “Bytyçi”, në “Festën e Plisit të Bardhë” në Dajt, në të cilën vijnë nga e gjithë Shqipëri, nga Kosova, nga Lugina e Preshevës, nga Mali i Zi, nga Maqedonia, nga diasporat shqiptare në botë prej nga Europa në Amerikë. Një Festë Shqiptare që i bashkon, gëzon e lumturon shqiptarët, që pritet si një eveniminet kombëtar në të dielën e fundit të muajt gusht të çdo viti kalendarik.

Ky libër i Agron Isa Gjediat ka diçka të veçantë: ia kushtimon në tematikë Plisit të Bardhë dhe në hyrje e si hymn babës së tij plisbardhë, njeriut të mirë Isa Gurec Gjedia, i cili e ka motivuar e frymëzue në jetën e tij, në veprimtaritë e tij me Shoqatën “Bytyçi” e Plisin e Bardhë. Treva e Bytyçit dhe e Malësisë së Gjakovës (Tropoja) kanë qënë tjetër gurrë burimore e frymëzimi për ta shkrue këtë libër në ditë të sodit.

Librin e kanë shkrue vet veprimtaritë e publikimet mediatike të tij për Plisin e Bardhë, për çka flasin referancat përfundi botimit të tyre.

Ky libër kap një hark kohor prej 7 vitesh. Niston me trajtesën e tij vështrimore “Plisi i Bardhë, simbol me rëndësi kombëtare që duhet ruajtur e trashëguar ndër breza” (Gazeta “Bytyçi”, nr. 8, datë 28 gusht 2011), ku jep disa parashtresa të tij. Në faqet e këtij libri me interes lexuesit e tij do të gjejnë disa artikuj me parashtresa, trajtesa e vështrime për Plisin e Bardhë, si kumtime, dokumente zyrtare, esse, ilustrimet me foto tematike, etj. Pra, Agron Isa Gjedia ka paraqit disa nga parashtresat, trajtesat e vështrimet e tij në veprimtaritë e 7 viteve për Plisin e Bardhë pa pretendue se ka krye një studim shterrues për Plisin e Bardhë, që tradition prej nga Lashtësia pellazgo-iliro-dardane. Gjithsesi, objekti i kësaj pasthanie nuk ka të bajnë dhe aq me përmbajtjen e librit, pasi gjithçka duhet do ta kenë në lexim e komentim vet lexuesit e faqeve të këtij libri për Plisin e Bardhë.

Ky është një libër, siç e thamë, që e ka shkrue vet veprimtaria e Agron Isa Gjediat si kryetar i Shoqatës Mbarëkombëtare “Bytyçi”, Tiranë-Prizren, si nismëtar, organizator e punëkryem i gjithatyne aktiviteteve e aksioneve për Plisin e Bardhë. Një libër që dëshmon, sidomos e veçmas udhën e sotme të Plisit të Bardhë, me kryeprijtarë Shoqatën ”Bytyçi” e kryetarin e saj të përkushtuar, av. Agron Isa Gjedia.

Njeriu është e nevojshme deri e domosdoshme të flasin për atë që mendon e punon për shoqërinë e kombin e vet, t’i përshkruajnë gjithfarësh e t’i dokumentojnë gjithqysh për brezat e sotëm e të nesërm të truallit e kohënave. Këtë po e ban autori Agron Isa Gjedia me librin e tij për Plisin e Bardhë. Ai, gjithsesi, nuk don ta quajnë kurrkush sikur ka “ekskluzivitet” apo “pronësi” mbi/për/ndaj Plisit të Bardhë, përkundrazi ka dëshirë e përpjekje të tij që me veprimtaritë e tjera dhe botimin e sotëm të këtij libri për Plisin e Bardhë t’i bajnë libër e veprimtari “pronë” të të tjerëve, që ata të marrin e përcjellin prej tyre ato çka iu duhen e u shërbejnë për ma shumë e për ma mire në udhët e kohërat e tyre.

Av. Agron Isa Gjedia është fort i dhanun pas Plisit të Bardhë, si simbol kombëtar shqiptar, të cilin e lart rendit, pas Flamurit Kombëtar Shqiptar e,pas Gjuhës Shqipe. Ai e sheh Plisin e Bardhë si një ndër elementët përfaqësues e mbrojtës të identitetit kombëtar shqiptar ndër shekuj historie. Ai ngrihet në mbrojtje të Plisit të Bardhë ndaj çdo ndërhyrjeje e keqdeformimi të tij me elementë plotësues apo shtojcë. Ai sjell fakte e argumente të tij për ta paraqitë Plisin e Bardhë si një Emblemë Hyjnore të Shqiptarisë.

E, në përmbyllje, shprehim bindje se bash dashuria traditore e dijetare dhe përkushtimi veprimtar i Agron Isa Gjedia për Plisin e Bardhë e kanë shkrue këtë libër të tij për Plisin e Bardhë Kombëtar Shqiptar.

Tiranë, gusht 2018

Leave a Reply

You must be Logged in to post comment.

© 2021 KosovaLindore · RSS · Designed by Theme Junkie · Powered by WordPress
ShqipEnglishDeutsch