Ish-kryetari i KNSH-së, z.Ragmi Mustafi emërohet këshilltar politik i Besnik Bislimit
Ish-kryetari i Këshillit Nacional të Shqiptarëve në Luginë të Preshevës, Ragmi Mustafi është emëruar në pozitën e këshilltarit politik të zëvendëskryeministrit të parë për Integrim Evropian, Zhvillim dhe Dialog në Qeverinë e Kosovës, Besnik Bislimi.
Në rrjetin e tij social facebook, z.Mustafi e ka konfirmuar se ka pranuar këtë detyrë, që do të jetë një rikonfirmim i Qeverisë së Kosovës për Luginën.
“Me mirënjohje, dua të njoftoj se sot kam pranuar pozitën e këshilltarit politik të zëvendëskryeministrit të parë për Integrim Evropian, Zhvillim dhe Dialog në Qeverinë e Republikës së Kosovës – Besnik Bislimi. Kjo mundësi e jashtëzakonshme për të shërbyer Kosovën dhe Luginën në kuadër të ekipit z. Bislimi edhe njëherë rikonfirmon përkushtimin e Qeverisë së Republikës të Kosovës ndaj shqiptarëve në Preshevë, Bujanoc dhe Medvegjë”, ka shkruar ai në rrjetin social Facebook.
Mustafi të mërkurën ka postuar edhe një fotografi me kryeministrin Albin Kurti, ku e ka quajtur lajm të mrekullueshëm atë që Qeveria e Kosovës ka ndarë 254 mijë e 562 euro për pajisje me tekste shkollore në gjuhën shqipe për nxënësit shqiptarë që vijojnë mësimin në shkollat fillore në Preshevë, Medvegjë e Bujanoc.
