Home » Lajme, Vendore » Kamberi e Mustafa, letër kryeministrit të Kosovës: Përjashtone Luginën për kërkesën për teste

Kamberi e Mustafa, letër kryeministrit të Kosovës: Përjashtone Luginën për kërkesën për teste

Kryetari i Këshillit Nacional të Shqiptarëve të Luginës, Ragmi Mustafa dhe deputeti popullor Shaip Kamberi i kanë dërguar letër Kryeministrit të Republikës së Kosovës z.Hoti, Ministrit të Shëndetësisë, z.Zemaj dhe drejtorit të IKSHPK-së, z.Naser Ramadani, ku kanë kërkuar përjashtimin e Luginës së Preshevës nga kufizimet e reja të paralajmëruara për hyrje dhe dalje në kufijtë e Kosovës me vendet fqinje.

Njoftimin e ka bërë të ditur Kryetari i KNSH-së, Ragmi Mustafa:

Sot, nëpërmjet një shkrese të përbashkët me deputetin popullor, z.Shaip Kamberi, në adresë të Kryeministrit të Republikës së Kosovës z.Avdulla Hoti; Ministrit të Shëndetësisë, z.Armend Zemaj dhe drejtorit të Institutit Kombëtar të Shëndetësisë Publike të Kosovës, z.Naser Ramadani; kërkuam përjashtimin e Luginës së Preshevës nga kufizimet e reja të paralajmëruara për hyrje dhe dalje në kufijtë e Kosovës me vendet fqinje.

Kërkesa për teste nënkupton de fakto mbylljen e kufirit për qytetarët e Luginës e Preshevës, meqë pjesa dërmuese prej tyre, nuk mund t’i sigurojnë ato. Përveç përjashtimin nga mbyllja e kufijve me Luginën e Preshevës në pikat kufitare në Muçibabë, Dheu i Bardhë dhe Merdare, kemi kërkuar po ashtu të mundësohet trajtimi i të infektuarve me Covid-19 nga Lugina e Preshevës në institucionet shëndetësore të Republikës së Kosovës, që në këtë situatë është jetike për shqiptarët e Luginës për shkak të urgjencës shëndetësore.

Lugina e Preshevës është duke u përballur së fundi me një gjendje jashtëzakonisht të rëndë me përhapjen e Covid-19. Numri i të infektuarëve po rritet çdo ditë.

Për arsye të njohura, shqiptarët e Preshevës, Bujanocit dhe Medvegjës frikësohen se mund të marrin trajtim dhe shërbim të duhur shëndetësor në spitalet rajonale, si ai i Vranjës dhe i Leskocit, ku edhe nuk ka pothuajse fare shqiptarë të punësuar.

Gjithashtu, tashmë ekonomia e dërmuar në Luginën e Preshevës ka pësuar goditje të rëndë nga masat e ndërrmara nga Republika e Serbisë për parandalimin e përhapjes së koronavirusit.

Qarkullimi i njerëzve dhe mallrave nga Lugina e Preshevës në Kosovë ndihmon sadopak edhe ekonominë vendore. Pra, mbyllja de fakto e kufirit e Republikës së Kosovës me Luginën e Preshevës do ta thellojë edhe më shumë katastrofën humanitare, shëndetësore dhe ekonomike të Luginës së Preshevës.

Leave a Reply

You must be Logged in to post comment.

© 2020 KosovaLindore · RSS · Designed by Theme Junkie · Powered by WordPress
ShqipEnglishDeutsch