Bordi i Paqes, Trump: Kosova e Shqipëria do të kontribuojnë me trupa paqeruajtëse

Read Time:3 Minute, 32 Second

Presidenti amerikan Donald Trump gjatë fjalimit të tij në takimin inaugurues të Bordit të Paqes në Washington DC ka thënë se Kosova dhe Shqipëria janë në mesin e shteteve që do të kontribuojnë me trupa paqeruajtëse.

“Shtetet përfaqësohen këtu jo vetëm me para, por që ofrojnë edhe personel për ruajtjen e paqes, për një paqe afatgjate, jo vetëm paqe që mund të thyhet pas dy javës. Indonezisë faleminderit shumë, Marokut, Shqipëria, Kosova, Kazakistani, të gjithë janë zotuar me trupa policore e ushtarake si paqeruajtës, me trupa, trajnim përkrahje për forcën policore palestineze, sepse po i sigurojnë tashmë njerëzit për atje. Tashmë kemi paqe në Lindjen e Mesme”, tha ai.

Trump falënderon Osmanin në mbledhjen inauguruese të Bordit të Paqes

Presidenti i Shteteve të Bashkuara të Amerikës, Donald Trump derisa ka prezantuar liderët botëror pjesëmarrës në mbledhjen inauguruese të Bordit të Paqes, e ka falënderuar presidenten e Kosovës, Vjosa Osmani.

“Faleminderit shumë, punë të mirë jeni duke bërë edhe ju”, i tha Trump, Osmanit.

Ky është takimi i parë i këtij bordi i thirrur nga presidenti amerikan. Përveç presidentes së Kosovës, në mesin e shumë liderëve botëror është edhe kryeministri i Shqipërisë, Edi Rama.

Trump thotë se e ndali një luftë të mundshme Kosovë-Serbi

Presidenti amerikan Donald Trump gjatë fjalimit të tij në takimin e Bordit të Paqes sërish ka përmendur ndaljen e një lufte të mundshme në mes të Kosovës dhe të Serbisë.

“Shembull, Kosovë-Serbi, e kam bërë këtë. A mund të ngriteni ju lutem? Kosova-Serbia. Ju vlerësojmë. Dhe po ia dilni, e kur nuk ia dilni, më thirrni e ne do ta zgjidhim”, ka thënë ai.

Trump, për këtë organizim, tha se është një prej ngjarjeve më të rëndësishme ku ai është përfshirë si president i Shteteve të Bashkuara.

“Është treguar se nuk është asgjë e pamundur. Me mijëra njerëz po vriteshin në Gaza kur mora mandatin, por falë një diplomacie të pandalshme dhe me përkushtimin e gjithë njerëzve këtu, 59 shtete e kanë nënshkruar, merreni me mend Gazën. Kemi një gjë të shkëlqyeshme tashmë, kaq shumë njerëz në këtë sallë. Tashmë lufta është e ndaluar atje, mund të ketë shkëndija tek e tuk. Hamasi do të dorëzojë armatimin e vetë, këtë e kanë premtuar, sigurisht nëse nuk e bëjnë këtë do të ballafaqohen me kundërshtinë e madhe. Më kanë thënë se nuk duan të vdesin, nuk duan të vdesin, askush nuk dëshiron të vdesë. Armëpushimi është mbajtur dhe çdo peng i vdekur e i gjallë është kthyer në shtëpi”, tha gjatë fjalimi të tij Trump.

Trump: SHBA do të kontribuoj me 10 milidarë dollarë në Bordin e Paqes

Gjatë fjalimit të tij, presidenti Trump tha se SHBA-të do të kontribuojnë me 10 miliardë dollarë në Bordin e Paqes. “Ne kemi pasur mbështetje të madhe për këtë shifër. Dhe kjo është një shifër shumë e vogël kur e shikon këtë krahasuar me koston e luftës”, tha Trump, pa dhënë detaje specifike se për çfarë do të shkonte ky fond.

Trump tha se udhëheqësit e disa kombeve, përfshirë Kazakistanin, Azerbajxhanin, Emiratet e Bashkuara Arabe, Marokun, Bahreinin, Katarin, Arabinë Saudite, Uzbekistanin dhe Kuvajtin “kanë kontribuar të gjithë më shumë se 7 miliardë dollarë për paketën e ndihmës për Gazën”.

“Kjo është shumë mirë. Faleminderit, shumë të tjerë po kontribuojnë. Ky është takimi ynë i parë”, shtoi ai.

Trump iu drejtua udhëheqësve të kombeve me të cilët ka punuar për të arritur marrëveshje paqeje, përfshirë udhëheqësit e Armenisë dhe Azerbajxhanit.

“Janë dy gjëra të vështira”, tha Trump, duke iu drejtuar dy udhëheqësve të këtyre shteteve. “Mendoni se kjo ishte e lehtë? Nuk ishte e lehtë. Këta janë dy njerëz të fortë, njerëz të mirë, por njerëz të fortë. Ne bëmë një marrëveshje, ata u përqafuan, ata e vendosën nënshkrimin dhe patëm paqe ndërmjet dy vendeve shumë të rëndësishme, dhe unë kurrë nuk do ta harroj këtë”, shtoi presidenti amerikan.

Tutje Trump tha se rezultati i bisedimeve me Iranin do të vendoset gjatë 10 ditëve të ardhshme. Më herët këtë javë, ministri i jashtëm i Iranit tha se SHBA-të dhe Irani arritën një mirëkuptim mbi “parimet udhëzuese” për bisedimet bërthamore.

“Tani mund të na duhet të bëjmë një hap më tej, ose mund të mos bëjmë”, shtoi Trump.