Jorn Rohde: Presidentes i shpreha shqetësimin për ngërçin e vazhdueshëm politik
Read Time:1 Minute, 5 Second
Ambasadori i Gjermanisë në Kosovë, Jorn Rohde, ka shkruar sot për takimin e një dite më parë që pati me presidenten e Republikës, Vjosa Osmani, të cilës thotë t’i ketë shprehur shqetësimin për ngërçin politik e institucional.
Diplomati gjerman ka treguar se në zyrën presidenciale, Osmanit i ka shprehur edhe shqetësimin për diskursin publik të kohëve të fundit që, siç thotë ai, hedh dyshime mbi vendimet gjyqësore.
“Faleminderit zonja Presidente për diskutimin e mirë! Në takim shpreha shqetësimin tim për ngërçin e vazhdueshëm politik dhe institucional, si dhe për diskursin publik të kohëve të fundit që hedh dyshime mbi vendimet gjyqësore, pasi zhvillime të tilla rrezikojnë të gërryejnë besimin e publikut në pavarësinë dhe integritetin e gjyqësorit”, shkroi ambasadori gjerman në rrjetin social ‘Bluesky’.
Rohde, ishte te Osmani të martën, e siç njoftoi zyra për media e presidencës të dy bashkë diskutuan për zhvillimet politike dhe të sigurisë në vend.
“Ndër të tjera, u diskutua për procesin e konstituimit të institucioneve si rezultat i zgjedhjeve të 9 shkurtit. Presidentja ka riafirmuar se sikurse gjithmonë, do të veprojë në përputhje të plotë me Kushtetutën dhe ligjet në fuqi, duke garantuar stabilitetin institucional dhe respektimin e vullnetit të qytetarëve të Kosovës”, thuhej në njoftimin që ka përcjellë presidenca për takimin mes Osmanit e diplomatit gjerman, Rohde.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
Average Rating