OKB shpall urinë në Gaza, Netanyahu e quan `gënjeshtër e pastër`

Read Time:2 Minute, 37 Second

Organizata e Kombeve të Bashkuara shpalli zyrtarisht urinë në Gaza të premten, më 22 gusht, duke fajësuar “pengimin sistematik” të ndihmës nga Izraeli gjatë më shumë se 22 muajve luftë. Kryeministri izraelit Benjamin Netanyahu hodhi poshtë konstatimet dhe e quajti raportin e mbështetur nga OKB-ja “një gënjeshtër e pastër”.

Iniciativa e Klasifikimit të Fazës së Sigurisë Ushqimore (IPC) me bazë në Romë tha se uria po prek 500 mijë persona në qarkun e Gazës, i cili mbulon rreth një të pestën e territorit palestinez, përfshirë qytetin e Gazës. IPC parashikoi se uria do të zgjerohet në qarqet Deir el-Balah dhe Khan Yunis deri në fund të shtatorit, duke mbuluar rreth dy të tretat e Gazës.

Shefi i ndihmave të OKB-së, Tom Fletcher, tha se uria ishte tërësisht e parandalueshme, duke theksuar se ushqimi nuk po mund të shpërndahet tek palestinezët në nevojë “për shkak të pengesave sistematike nga Izraeli”. Agjencitë e OKB-së dhe grupet e ndihmës kishin paralajmëruar prej muajsh për një uri të afërt në Gaza, ku Izraeli ka kufizuar rëndë ndihmat dhe herë pas here i ka ndërprerë ato gjatë pothuajse dy viteve luftë me Hamasin.

Ministria e Jashtme e Izraelit tha se “nuk ka uri në Gaza” dhe e quajti raportin “të bazuar në gënjeshtra të Hamasit të pastruara përmes organizatave me interesa të caktuara”. COGAT, një organ i Ministrisë së Mbrojtjes së Izraelit që mbikëqyr çështjet civile në territoret palestineze, tha se gjetjet e IPC-së mbështeten në “të dhëna të pjesshme dhe burime të pasigurta”.

Izraeli ka vazhduar planet për të marrë qytetin e Gazës pavarësisht reagimeve ndërkombëtare, duke thënë se marrja e qytetit më të madh të territorit është kyçe për të mposhtur Hamasin. Sekretari i Përgjithshëm i OKB-së, Antonio Guterres, bëri thirrje për armëpushim, ndërsa Hamas kërkoi ndaljen e luftës dhe heqjen e bllokadës, duke kërkuar qasje për ushqim, ilaçe, ujë dhe karburant.

Shefi i të Drejtave të Njeriut të OKB-së, Volker Turk, tha se është “krim lufte të përdorësh urinë si metodë lufte”, një akuzë për të cilën Gjykata Penale Ndërkombëtare në nëntor lëshoi urdhër arresti për Netanyahu. Ai tha se “Izraeli nuk ka politikë të urisë”, duke përmendur të dhëna për ndihmën e lejuar në Gaza.

Raporti i IPC-së tha se “më shumë se gjysmë milioni njerëz në Rripin e Gazës po përballen me kushte katastrofike të karakterizuara nga uri, varfëri e skajshme dhe vdekje.” Raporti theksonte se përkeqësimi midis korrikut dhe gushtit ishte më i rëndi që nga fillimi i analizave për urinë në Gaza, i nxitur nga përshkallëzimi i luftës dhe kufizimet në furnizime. Në fillim të marsit, Izraeli ndaloi plotësisht ndihmën për Gazën për dy muaj, duke shkaktuar mungesa të rënda ushqimi, ilaçesh dhe karburanti.

Duke folur nga Gjeneva, Fletcher tha: “Është një uri që mund ta kishim parandaluar nëse do të na lejohej. Por ushqimet grumbullohen në kufij për shkak të pengesave sistematike nga Izraeli.”

Komiteti Ndërkombëtar i Kryqit të Kuq tha se Izraeli “duhet të sigurojë që nevojat bazë të popullsisë civile në Gaza të plotësohen”. Shpallja e urisë “duhet të shërbejë si një katalizator për veprime të menjëhershme dhe konkrete,” shtoi ai.