Komisioni Qendror i Zgjedhjeve: Përfundon numërimi i votave të kandidatëve në 5 komuna

Read Time:1 Minute, 16 Second

Komisioni Qendror i Zgjedhjeve ka njoftuar se ka përfunduar numërimi i votave të kandidatëve për deputetë në 5 komuna dhe vazhdon në 29 të tjera. Komisioni Qendror i Zgjedhjeve, të premten pasdite, ka njoftuar se numërimi i votave për kandidatët për deputetë ka përfunduar në komunat e Hanit të Elezit, Shtërpcës, Parteshit, Ranillugut dhe Junikut.

Sipas KQZ-së, është duke vazhduar procesi i numërimit të votave të kandidatëve për deputetë në Qendrat Komunale të Numërimit në komunat e ndryshme të Kosovës.

KQZ-ja ka njoftuar se gjatë ditës procesi i numërimit të votave të kandidatëve ka filluar edhe në Qendrat Komunale të Numërimit në komunat: Dragash, Istog, Rahovec, Pejë, Podujevë, Klinë, Malishevë dhe Graçanicë.

Numërimi në komuna ka filluar sipas këtyre datave:

• 11 shkurt 2025 – Prishtinë, Lipjan, Obiliq dhe Partesh;

• 12 shkurt 2025 – Deçan, Gjakovë, Drenas, Gjilan, Fushë Kosovë, Kamenicë, Mitrovicë e Jugut, Skënderaj, Shtërpcë, Viti, Ranillug, Kllokot, Mitrovicë e Veriut dhe Han i Elezit;

• 13 shkurt 2025 – Suharekë, Ferizaj, Vushtrri, Kaçanik, Novobërdë, Prizren, Shtime dhe Junik.

Në QKN-të e komunave Leposaviq, Zveçan, Zubin Potok dhe Mamushë, nuk ka filluar ende numërimi, por për këtë do të ketë njoftim me kohë.

Ndërkohë, siç ka njoftuar gazetarja e RTK-së Edona Podvorica, në QKN-në “1 Tetori” në Prishtinë, më e madhja në Kosovë, deri në orën 16:00 janë numëruar 49 vendvotime, ndërkaq kanë mbetur edhe 219 të tjera. Ndërsa, sipas të dhënave të fundit që nuk përfshijnë numërimin që është bërë sot në nivel vendi, thuhet se janë numëruar 400 vendvotime.