Podujevë, Haradinaj: Baki Feta është njeriu i duhur për Llapin

Read Time:1 Minute, 20 Second

Aleanca për Ardhmërinë e Kosovës ka vazhduar sot fushatën elektorale për zgjedhjet lokale të 12 tetorit në qytetin e Podujevës. Kryetari i AAK-së, Ramush Haradinaj, vlerësoi ekipin kandidues të partisë, duke e cilësuar kandidatin për kryetar të Podujevës, Baki Feta, si njeriun e duhur për Llapin.

“Suksesi i prijësit është kur din me i ofru njerëzit. Lista që paraqesim më 12 tetor në Llap e Gollak jeni ju patriotë të dijshëm. Ju falënderoj të gjithëve dhe shpresoj që të dilni të suksesshëm në këtë garë. Ne ndoshta s’kemi ditë t’i lavdërojmë punët tona, por kudo që qeverisim e bashkëqeverisim, drejtorët tanë dallojnë. Besoj shumë që Podujeva, duke e votuar Bakin, po e vazhdon traditën e saj të vyeshme e të ditur”, deklaroi Haradinaj.

Kandidati i AAK-së për kryetar të Komunës së Podujevës, Baki Feta, tha se programin e tij e ka bazuar mbi nevojat e qytetarëve, duke premtuar transparencë dhe vendosmëri për zhvillim të komunës drejt një të ardhmeje më të mirë.

“Transparencë dhe llogaridhënie. Arsimi, investimi më i madh për gjeneratat e reja me shkolla me kushte më të mira; kulturë, rini dhe sport, më shumë hapësira për aktivitete. Do të punojmë për zhvillime në infrastrukturë, hapësira për personat me nevoja të veçanta, si dhe turizëm përmes projekteve që e promovojnë atë. Përfshihet edhe kategoria e dalë nga lufta, me politika të qarta dhe mbështetje, sepse kjo kategori është alfa dhe omega e vendit”, tha ndërkaq Baki Feta, kandidat i AAK-së për kryetar të Podujevës.

AAK ka prezantuar gjithashtu edhe listën e saj me 14 kandidatë për Asamblenë Komunale në Podujevë.