PDK: Kuvendi ende nuk është i konstituuar, ftesa është e kotë

Read Time:1 Minute, 18 Second

Partia Demokratike e Kosovës ka reaguar ndaj deklaratës së kryetarit të ri të Kuvendit të Kosovës, Dimal Basha, lidhur konstituimin e Kuvendit e që sipas këtij subjekti politik kjo nuk mund të konsiderohet e tillë pa u zbatuar në tërësi Neni 67 i Kushtetutës së Kosovës dhe se ftesa për takim të Kryesisë së Kuvendit ende të pakonstituuar është epakuptimtë, sepse nuk është zgjedhur kryesia e tij në përbërjen e plotë kushtetuese.

Në një komunikatë për medie, PDK thotë se në këto rrethana është e pakuptimtë ftesa për takim të Kryesisë së Kuvendit që nuk është konstituuar, duke theksuar se nuk merr pjesë në takime të tilla, të cilat sipas PDK-së, i shërbejnë vetëm agjendave partiake e jo interesit të shtetit.

“PDK vlerëson se zvarritjet e qëllimshme në procesin e themelimit të institucioneve shtetërore, të shkaktuara nga partia e parë, janë skajshmërisht të rrezikshme për Republikën e Kosovës”, thuhet në komunikatë.

Sipas këtij subjekti politik, edhe pse nuk kishte detyrim kushtetues apo politik, Partia Demokratike e Kosovës mori mbi vete përgjegjësinë institucionale duke votuar për Kryetarin e Kuvendit, me qëllim të vetëm zhbllokimin e institucionit më të lartë përfaqësues të qytetarëve.

Megjithatë, PDK thekson se veprimet e mëtejshme dhe skemat populiste të Vetëvendosjes po e dëshmojnë qartë frikën e saj nga hyrja e ligjshme në afatet kushtetuese për të provuar krijimin e qeverisë së re.

Tutje, PDK nënvizon se kjo qasje po e shtyn Kosovën drejt një krize të re institucionale, pasojat e së cilës do t’i bartin shteti dhe qytetarët tanë.