Albin Kurti takoi aktivisten Nuraj, u jep mbështetje pakicës shqiptare në Serbi

Kryeministri i Kosovës, Albin Kurti ka pritur në takim aktivisten e çështjes kombëtare të shqiptarëve në Sanxhak, Amina Nuraj, të cilës i ka dhënë mbështetje për mbrojtjen dhe promovimin e kulturës, identitetet dhe traditës shqiptare dhe avokimin e të drejtave të pakicave kombëtare në Serbi.

Bashkë me aktivisten Nuraj në takim ishte edhe Granit Hyseni, i cili u zhvendos atje për të studiuar.

Në këtë takim, Kurti dhe Nuraj folën për pozitën e shqiptarëve në Serbi, veçanërisht në Sanxhak, dhe për sfidat dhe vështirësitë e tyre.

Kryeministri e falënderoi aktivisten Nuraj për kontributin dhe angazhimin e palodhshëm të saj, dhe uroi punë të mbarë me rastin e hapjes së zyrës së Këshillit Kombëtar Shqiptar në Pazarin e Ri, njofton Kryeministria.

Kjo zyre u hap të mërkurën, ndërsa i pranishëm në ceremoninë ka qenë edhe kryetari i Këshillit Kombëtar të Shqiptarëve në Serbi, Nevzad Lutfiu.

Kujtojmë se në tetor të vitit të kaluar, Qeveria e Kosovës kishte nënshkruar memorandum bashkëpunimi me Këshillin Kombëtar Shqiptar, me qëllim përkrahjen financiare për mbrojtjen dhe promovimin e të drejtave të shqiptarëve, ruajtjen, kultivimin e gjuhës, artit, kulturës e identitetit shqiptar.​

Lini një Përgjigje

Previous post Presidenti serb, Vuçiq: 1000 herë kam thënë, nuk e nënshkruaj anëtarësimin e Kosovës në OKB
Next post Harresa dhe ringjallja e kujtesës