Mediat ndërkombëtare raportojnë për situatën në veri

November 5, 2022November 5, 2022

Read Time:1 Minute, 24 Second

Mediat e mëdha ndërkombëtare janë duke raportuar për tensionimin e situatës në veri të vendit.

Agjencia e madhe e lajmeve Reuters shkruan se pakica serbe në veri të Kosovës, braktisën të shtunën vendet e tyre të punës në institucionet shtetërore, duke përfshirë qeverinë, policinë dhe gjykatat, për të protestuar ndaj urdhrit të Prishtinës zyrtare që ata të fillojnë përdorimin e targave të makinave të Kosovës.

“Grindja e gjatë për targa ka ndezur tensione midis Serbisë dhe ish krahinës së saj të Kosovës, e cila fitoi pavarësinë në 2008 dhe është vendi i një pakice të vogël etnike serbe në veri që mbështetet nga Beogradi”, raporton Reuters, transmeton RTKlive.

E në lidhje me këtë situatë, raporton edhe agjencia tjetër e madhe e lajmeve, AP.

Ky medium rikujton se gjatë kësaj jave, autoritetet shkarkuan një oficer të lartë të policisë serbe në veriun e Kosovës, ku jetojnë shumica e serbëve etnikë, që refuzuan të respektojnë vendimin për të ndryshuar targat e makinave.

“Zhvendosja ka ndezur një çështje shpërthyese rreth sovranitetit të Kosovës, veçanërisht midis pakicës serbe, shumë nga të cilët ende duan që ish krahina serbe të jetë pjesë e Serbisë dhe jo e pavarur”, raporton AP, transmeton RTKlive.

Situata deri në këtë pikë erdhi pas takimit të sotëm të përfaqësuesve politik serb, te cilët vendosën që të largohen nga te gjitha institucionet e Kosovës, si nga niveli qendror, por edhe ai lokal në katër komunat e veriut të Kosovës.

Ky vendim, sipas tyre, u ndërmor si reagim ndaj vendimit të Qeverisë së Kosovës për fillimin e zbatimit të vendimit për targat, fillimisht me masën e qortimit, e pas datës 21 nëntor, edhe me shqiptim të gjobave.