OVL-UÇK dënon keqpërdorimin e flamurit të UÇK-së në akte vandalizmi
Read Time:1 Minute, 4 Second
Organizata e Veteranëve të Luftës së Ushtrisë Çlirimtare të Kosovës (OVL-UÇK) ka dënuar çdo keqpërdorim të flamurit me simbolin e UÇK-së në akte vandalizmi, duke bërë thirrje që ky simbol të mos lidhet me dhunën, shkatërrimin dhe plaçkitjet.
Përmes një reagimi në Facebook, OVL-UÇK ka theksuar se flamuri me simbolin e UÇK-së përfaqëson Luftën Çlirimtare të Kosovës, dëshmorët e kombit dhe lirinë e fituar nga sakrifica e tyre.
“Ky simbol përfaqëson Luftën Çlirimtare të Kosovës, dëshmorët e kombit dhe lirinë e fituar nga kjo sakrificë. Si i tillë, kurrë nuk mund të përdoret për të justifikuar, identifikuar apo fshehur veprime që dëmtojnë pronën publike apo private”, thuhet në reagim.
Organizata ka theksuar se çdo qytetar ka të drejtën e protestës, por pakënaqësitë nuk mund të përdoren për ta lidhur flamurin e UÇK-së me veprime të dhunshme.
“Çdo qytetar ka të drejtën e protestës, por asnjë pakënaqësi, sado e thellë të jetë, nuk i jep të drejtë askujt ta lidhë flamurin e UÇK-së me dhunën, shkatërrimin dhe plaçkitjet”, thuhet më tej.
OVL-UÇK u ka bërë thirrje organizatorëve dhe pjesëmarrësve të protestave që ta ruajnë dinjitetin e këtij simboli.
“U bëjmë thirrje të gjithë organizatorëve dhe pjesëmarrësve të protestave, të ruajnë dinjitetin dhe shenjtërinë e këtij simboli”, përfundon reagimi.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
Average Rating