Sylvinho: Synojmë fitoren në ndeshjen e nesërme me Moldavinë

Read Time:1 Minute, 28 Second

Trajneri i Kombëtares së Shqipërisë, Sylvinho ka thënë se synon fitoren në ndeshjen e vlefshme me Moldavinë, e cila zhvillohet nesër.

Aktualisht Shqipëria kryeson Grupin E me trembëdhjetë pikë, dy më shumë se Çekia në vendin e dytë. T

Trajneri brazilian dhe kapiteni i i Kombëtares shqiptare, Berat Gjimshiti janë shfaqur në një konferencë për shtyp një ditë para ndeshjes.
“Nesër si ne, po edhe Moldavia do të shkojmë për të marrë tre pikët në këtë sfidë jo për barazim. Sigurisht është një finale për ne dhe karikimi i skuadrës është i duhuri. Moldavia është një ekip shumë i fortë në shtëpi, ka mundur Poloninë, ka barazuar me Çekinë , kështu që do të jetë një ndeshje e vështirë”, ka thënë Sylvinho. “Luajmë ndaj Moldavisë, një kundërshtar shumë i fortë, ekip i mirëorganizuar, kanë lojtarë që në aspektin individual janë shumë cilësorë, një skuadër shumë fizike dhe sidomos në fushën e vet janë shumë të vështirë”.
Nga ana tjetër, Gjimshiti ka theksuar se me Moldavinë do jetë ndeshje e vështirë, siç kanë qenë edhe ndeshjet e tjera.
“Do e përballojmë si gjithmonë. Nuk e harrojmë ndeshjen në ‘Air Albania’, deri në minutën e 60-të kur bëri gjuajtjen Asani nuk kishim shumë raste për të shënuar gol. E dimë vështirësinë në këtë ndeshje. Jemi përgatitur shumë mirë për t’i përballuar ato që ndodhin në fushë. Të shkojmë të gjithë në një drejtim”, është shprehur futbollisti i Atalantas. “Unë, por as ekipi, nuk do të hyjmë në fushë për barazim. Asnjë ekip nuk futet në fushë për një pikë. Në natyrë e kemi që të futemi në fushë për tre pikë, kështu do jetë edhe nesër. Nëse nuk futesh me atë mentalitet ke shumë mundësi të gabosh akoma më shumë”.