Besnik Bislimi: Kur Lugina thërret, ne gjithmonë do të përgjigjemi

Read Time:2 Minute, 3 Second

Sot, në mbledhjen e 115 të Qeverisë së Kosovës, është miratuar Vendimi për ndarjen e mjeteve buxhetore për Luginën e Preshevës

Me anë të këtij vendimi realizohen komplet mjetet prej 2 milion euro të ndara për Luginën e Preshevës nga ana e Qeverisë së Kosovës.

Në lidhje me këtë vendim është prononcuar zëvendëskryeministri Besnik Bislimi

Postimi i z.Bislimi

78 grante për projekte në vlerën totale mbi 1 milionë euro dhe përkrahje financiare me bursë për studentët, ku 107 të rinj e të reja do të përfitojnë bursë vjetore në shumë prej 1.000 euro, në vlerën totale prej 107 mijë euro. Për herë të parë, kemi ndarë mjete për Luginën në këto përmasa.
Gjatë këtij viti, kemi siguruar e dërguar për herë të parë libra në gjuhën shqipe për nxënësit e Luginës së Preshevës, në vlerën prej 255 mijë eurove. Në muajin qershor e atë tetor, kemi ndarë respektivisht 50 mijë dhe 35 mijë euro të tjera shtesë. Gjatë shtatorit, së bashku me ministren Nagavci, vizitova Preshevën, Medvegjën e Bujanocin ku i shpërndamë dhe tekstet shkollore për nxënësit.
Ruajtja e kulturës e identitetit është jetike për Luginën e Preshevës. Qeveria e Republikës së Kosovës ndan mjetet financiare që kanë synim promovimin e interesave të shqiptarëve në Luginë, e parandalimin e shpopullimit të vendit.
Përkrahja financiare është për organizata të shoqërisë civile, studentët, individë e shoqata të pakicës kombëtare shqiptare bazuar në thirrjen publike të shpallur me 1 nëntor 2022 nga ana e Këshillit Kombëtar Shqiptar për grante dhe bursa.
Vëmendja jonë ndaj Luginës zë një vend të veçantë. Përkrahja jonë vjen si rezultat i përkushtimit dhe angazhimit ndaj të drejtave dhe nevojave të qytetarëve në Luginën e Preshevës.
Zbatimi i projekteve përfituese fillon nga muaji janar. Përzgjedhja është përfunduar në baza meritore dhe duke patur parasysh tre kritere: arsyeshmërinë e buxhetit, kapacitetin për zbatim të projektit të propozuar dhe relevancën e projektit me kërkesat e thirrjes.
E kemi mbajtur premtimin tonë për ndarjen e mjeteve për Luginën e Preshevës. Jemi angazhuar për drejtësi e transparencë, për shpërndarje të barabartë. E dimë që Lugina e Preshevës ka nevojë për më shumë, andaj dhe ne do vazhdojmë të përkushtohemi që brenda kapaciteteve tona, të bëjmë më shumë e të bëjmë më mirë.
Kur Lugina thërret, ne gjithmonë do të përgjigjemi. Këto iniciativa tona gjatë këtij viti, që erdhën për herë të parë si përkrahje për Luginën e Preshevës, do të vijojnë në forma e mënyra të ndryshme edhe përgjatë vitit të ardhshëm.