Lëvizja Për Bashkim: Vendimet politike nuk mund ta ndërrojnë karakterin e një lufte

December 16, 2022December 16, 2022

Read Time:1 Minute, 10 Second

Pas dënimit të Sali Mustafës në Dhomat e Specializuara në Hagë, ka reaguar Lëvizja Për Bashkim e cila këtë dënim e quan drakonik ndaj një luftëtari të lirisë.

“Që nga mënyra e krijimit, nga presioni i jashtëzakonshëm ndërkombëtar mbi institucionet e Kosovës dhe mbi përfaqësues të saj, nga kërcënimi publik se “nëse nuk e formojmë ne, e formon Rusia në kuadër të OKB-së”, e deri te qëllimi i hapur i saj (“të dy palët fajtore” dhe “pajtimi i palëve”), – ka qenë e qartë se kjo gjykatë nuk do të ndajë drejtësi, por do të shpallë vetëm vendime politike. Kjo edhe ndodhi sot”, konsideron LB.

Ky subjekt politik thuhet se nga fillimi ka qenë kundër krijimit të kësaj gjykate, “e veçanërisht jo para se ta marrë dënimin e merituar agresori dhe mekanizmat e tij, të cilët janë përgjegjës për shumë masakra të tmerrshme në Kosovë dhe për mijëra dhunime e për shkretimin e plotë të Kosovës”.

“Lëvizja për Bashkim mbetet e paluhatur dhe e bindur thellë se, pavarësisht përpjekjeve të Serbisë e të një pjese të bashkësisë ndërkombëtare për ta njollosur atë, lufta jonë ka qenë e drejtë e çlirimtare!”, thuhet në reagimin e kësaj partie.

Ndryshe, sot pas një procesi të gjatë, Dhomat e Specializuara në Hagë, kanë dënuar me 26 vjet heqje lirie, ish-komandanti i Ushtrisë Çlirimtare të Kosovës, Salih Mustafa, për vrasje të paligjshme, ndalim arbitrar dhe torturë.