Shqiptarët e Luginës së Preshevës sot votuan për 15 përfaqësuesit e Këshillit Nacional Shqiptarë
Mbi 36 mijë shqiptarë me të drejtë vote në Serbi, sot do të mund të zgjedhin 15 përfaqësuesit e tyre për Kuvendin e Këshillit Nacional të Shqiptarëve të Luginës së Preshevës.
55 vendvotimet në Preshevë, Medvegjë e Bujanoc, janë hapur në orën 07:00 dhe janë mbyllur ora 20.00.
Përfaqësuesit e administratave komunale të cilët edhe janë organizatorë të zgjedhjeve kanë thënë se nuk ka pasur ndonjë problem të evidentuar, ndërsa qytetarët deri dje e patën mundësinë që të hyjnë në listën e veçantë zgjedhore.
“Numri i vendvotimeve në Luginën e Preshevës është 55 me votues shqiptarë, ndërkaq numri i votuesve që janë të regjistruar në listën e veçantë zgjedhore të pakicave kombëtare janë rreth 36500 votues. Në Luginën e Preshevës janë hapur të gjitha vendvotimet dhe nuk është paraqitur asnjë incident”, ka thënë Hevzi Ramadani, kryeshef i administratës komunale në Preshevë.
Votuesit presin nga Këshilli Kombëtar Shqiptarë një qasje më proaktive drejt zgjidhjes së të drejtave themelore kombëtare që Serbia po i nëpërkëmbë.
Për shumicën në Kuvendin e KNSh-së në Luginë në garë janë pesë lista të partive politike që i tubojnë shqiptarët e kësaj zone. I pari i KNSH-së zgjidhet nga shumica e gjithsej 15 këshilltarëve.
Deri më sot nuk ka pasur ndonjë koalicion parazgjedhor. E Këshillat Nacionale konsiderohen me rol të rëndësishëm në ruajtjen dhe kultivimin e identitetit të pakicave që jetojnë në Serbi.
