Ardita Sinani përshëndetë arritjen e marrëveshjes për njohjen e diplomave

Lajm tepër të mirë e ka cilësuar Këshilltarja e Kryeministrit, Ardita Sinani njohjen e diplomave të kualifikimeve të arsimit të lartë, si një nga tri marrëveshjet e lëvizshmërisë, të firmosura sot në Berlin, nga ana e krerëve të qeverive të gjashtë vendeve të Ballkanit Perëndimor, në kuadrin e Planit të Veprimit të Tregut të Përbashkët Rajonal (CRM).

Sinai ka veçuar posaçërisht njohjen e diplomave të Republikës së Kosovës për studentët e Luginës së Preshevës
“Njohja e diplomave (Bachelor, Master dhe Phd) është jetike sidomos për shtetasit e Republikës së Serbisë me diploma të Republikës së Kosovës, të cilët privohen padrejtësisht nga e drejta për punësim dhe punë në Serbi, që nga viti 2008. E pjesa dërmuese e tyre janë shqiptarë” ka deklaruar Ardita Sinani

“Po aq të rëndësishme dy marrëveshjet e tjera të sotme janë ato për lëvizjen e lirë me letërnjoftime dhe për njohjen e kualifikimeve profesionale të mjekëve, dentistëve dhe arkitektëve.
Besojmë se këtë herë autoritetet përgjegjëse të Republikës së Serbisë nuk do ta bllokojnë zbatimin e marrëveshjes, si në rastin e marrëveshjeve paraprake për njohjen e diplomave midis Kosovës dhe Serbisë të firmosura në Bruksel dhe Washington” ka përfunduar znj.Sinani