OKB, Konjufca: Serbia vrau 12 mijë shqiptarë në Kosovë

Read Time:6 Minute, 27 Second

Zëvendëskryeministri i parë dhe ministri i Punëve të Jashtme dhe Diasporës, Glauk Konjufca, tha se Serbia po vazhdon kërcënimet ndaj Kosovës, duke ekspozuar, synimet e saj ekspansioniste territoriale. Ai theksoi se zyrtarët serbë po e sfidojnë hapur Kosovën. Konjufca tha gjithashtu se personat që kanë kryer krime në Kosovë po vazhdojnë të jetojnë të lirë.Ai deklaroi se Serbia ka vrarë 12 mijë shqiptarë në Kosovë.

Konjufca në OKB: Serbia vrau 12 mijë shqiptarë, kërkon drejtësi edhe për Banjskën

(E plotësuar) Konjufca ka deklaruar se Serbia ka vrarë 12 mijë shqiptarë të paarmatosur gjatë luftës në Kosovë, duke kritikuar ministrin e Jashtëm serb, Marko Gjuriq, për mospërmendjen e viktimave shqiptare në deklarimin e tij para Këshillit të Sigurimit të OKB-së.

“Zonja presidente, shteti i Serbisë, me flamurin e Serbisë, ka vrarë në vendin tim 12 000 njerëz të paarmatosur, të pafajshëm, shqiptarë. Asnjë fjalë nga ministri Gjuriq për 12 000 shqiptarë të vrarë! Këtë e quaj unë mohim të drejtësisë”, ka deklaruar Konjufca.

Në vazhdim të fjalimit të tij, ai ka kërkuar nga Serbia që të mbajë përgjegjësi për sulmin e 24 shtatorit 2023 në Banjskë dhe të ndalë, siç ka thënë, politikën armiqësore ndaj Kosovës.

“Duhet të ndalë pengimin sistematik të anëtarësimit të Kosovës në organizatat ndërkombëtare dhe të miratojë njohjen e ndërsjellë si bazë për marrëdhëniet ndërshtetërore”, ka thënë ai.

Konjufca ka akuzuar Beogradin zyrtar për mbështetje të sulmit në Banjskë, duke përmendur Milan Radoiçiqin, të cilin e ka cilësuar si organizator të sulmit. Ai ka kritikuar faktin që Radoiçiqi është shfaqur në një tubim politik të presidentit serb, Aleksandar Vuçiq, në Kragujevc, në vend që të përballet me drejtësinë.

“Këto nuk janë provokime të izoluara, ato ekspozojnë një doktrinë armiqësore, ekspansionizëm territorial dhe pandëshkueshmëri për agresion të armatosur”, ka deklaruar Konjufca.

Ai ka kërkuar nga bashkësia ndërkombëtare që të dënojë veprimet e tilla dhe të kërkojë llogaridhënie për sulmin në Banjskë.

“Sovraniteti i Republikës së Kosovës nuk është i negociueshëm, e as drejtësia për sulmin terrorist të Banjskës”, ka theksuar ai.

Kritikon deklaratat e zyrtarëve serbë

Konjufca ka ngritur shqetësime edhe për deklaratat e zyrtarëve serbë, të cilat i ka cilësuar si nxitëse të pastrimit etnik dhe si shprehje të ambicieve territoriale ndaj Kosovës.

Ai ka përmendur deklaratën e ministres serbe për Administratë Shtetërore dhe Pushtet Lokal, Snezhana Paunoviq, e cila, sipas tij, në një emision televiziv kishte thënë: “Po të isha unë Slobodan Milosheviq, unë do ta pastroja etnikisht Kosovën në vitin 1998”.

Konjufca ka përgëzuar reagimin e Bashkimit Evropian ndaj kësaj deklarate dhe i ka bërë thirrje Këshillit të Sigurimit që të dënojë glorifikimin e kriminelëve të luftës dhe deklaratat që arsyetojnë pastrimin etnik.

Ai ka kritikuar edhe nderimet për Ratko Mladiqin, të dënuar për gjenocidin në Srebrenicë, si dhe deklaratën e zëvendëskryeministrit serb Ivica Daçiq se flamuri serb herët a vonë do të valëvitet mbi Prizren.

Sipas Konjufcës, këto deklarata tregojnë se ambiciet territoriale të Beogradit ndaj Kosovës nuk i përkasin vetëm së kaluarës.

Përmend diskriminimin e shqiptarëve në Luginën e Preshevës

Gjatë fjalimit, Konjufca ka folur edhe për gjendjen e shqiptarëve në Luginën e Preshevës, duke pretenduar se ata përballen me diskriminim sistematik dhe përjashtim nga sektori publik.

Ai ka thënë se shqiptarët përbëjnë 71 për qind të popullsisë së kombinuar të këtij rajoni, sipas regjistrimit të popullsisë në Serbi më 2022, por se përfaqësimi i tyre institucional mbetet i ulët.

Konjufca ka krahasuar këtë situatë me Kosovën, ku, sipas tij, 20 nga 120 ulëset në Kuvend janë të garantuara për komunitetet joshumicë, përfshirë dhjetë ulëse për komunitetin serb.

Konjufca flet edhe për aktgjykimin ndaj ish-krerëve të UÇK-së

Në pjesën tjetër të deklarimit, Konjufca ka folur për aktgjykimin e fundit të Dhomave të Specializuara të Kosovës në Hagë ndaj ish-krerëve të Ushtrisë Çlirimtare të Kosovës (UÇK).

Ai ka thënë se Kosova ka bashkëpunuar me Tribunalin e Hagës, institucionet e tjera të OKB-së dhe gjykatat vendore për ndjekjen dhe dënimin e krimeve të luftës, pavarësisht përkatësisë etnike të kryerësve.

Konjufca ka rikujtuar se Dhomat e Specializuara janë themeluar në vitin 2015, me insistimin e aleatëve të Kosovës, pas pretendimeve për krime të rënda nga pjesëtarë të UÇK-së.

Ai ka pretenduar se pretendimet për trafikim organesh, të cilat i ka cilësuar si fabrikime, nuk kanë qenë pjesë e akuzës në aktgjykimin e fundit. Po ashtu, ka shprehur shqetësime për dënimet e shqiptuara, duke thënë se ato, sipas tij, përmbajnë gabime në përmbajtje dhe në vlerësimin e fakteve.

“Drejtësia duhet të jetë e paanshme dhe duhet të perceptohet e të shihet si e paanshme”, ka deklaruar ai, duke shtuar se Kosova pret që shqetësimet e saj të adresohen në procedurën e apelit.

Në fund, Konjufca ka përmendur edhe rreth 20 mijë viktimat e dhunës seksuale gjatë luftës në Kosovë dhe ka theksuar se shumë kryerës të krimeve të luftës ende nuk janë ndëshkuar.

“Kosova kërkon drejtësi për secilën viktimë, për secilin krim e për secilin kryerës të këtyre krimeve. Nuk mund të lejojmë barazim të fajësisë thjesht për shkak se dikush deshi ta ndërtonte një narrativë alternative. Plagët e luftës ende janë të freskëta në Kosovë”, ka përfunduar Konjufca.

Konjufca: Raporti i UNMIK-ut është selektiv dhe përmban dezinformata për Kosovën

Zëvendëskryeministri i parë dhe ministri i Punëve të Jashtme dhe Diasporës, Glauk Konjufca, i cili po përfaqëson Kosovën në mbledhjen e Këshillit të Sigurimit të Organizatës së Kombeve të Bashkuara (OKB), tha se Kosova ka shënuar përparim në shumë fusha.

Ai e cilësoi raportin e UNMIK-ut si selektiv, duke thënë se një pjesë e tij bazohet në propagandën serbe dhe përmban dezinformata për Kosovën.

Konjufca ka kritikuar raportin e UNMIK-ut për Kosovën, duke pretenduar se ai bazohet kryesisht në atë që e cilësoi si propagandë serbe dhe se nuk i pasqyron plotësisht përpjekjet e institucioneve të Kosovës për sundimin e ligjit, stabilitetin dhe lirinë e lëvizjes.

Duke folur para Këshillit të Sigurimit të Organizatës së Kombeve të Bashkuara (OKB), Konjufca ka kritikuar edhe mënyrën se si raporti i referohet sulmit në Banjskë, më 24 shtator 2023. “Është po ashtu fatkeqësi të shohim që prapë edhe sulmi paramilitar në Banjskë, i orkestruar, i organizuar, i mbështetur nga Beogradi zyrtar përmes Milan Radoiçiq-it, referohet e përmendet në këtë raport si një ‘ngjarje e dhunshme’ në vend se të përmendet ashtu siç është: sulm terrorist”, ka deklaruar Konjufca.

Ai ka kundërshtuar gjithashtu atë që e ka cilësuar si keqpërdorim të konotacioneve etnike dhe keqinterpretim të veprimeve të institucioneve të Kosovës në raportin e UNMIK-ut.

“Është dëshpëruese që shumë nga këto raste të trajtuara dhe të diskutuara në raportin e UNMIK-ut bazohen kryesisht te propaganda serbe”, ka thënë ai.

Konjufca ka theksuar se Kosova vazhdon të jetë një nga demokracitë më stabile të Evropës Juglindore, duke përmendur përparimin në luftën kundër korrupsionit, forcimin e sundimit të ligjit dhe mbrojtjen e të drejtave dhe lirive të njeriut.

“Vlerësimet e pavarura tregojnë që kemi arritur sukses në luftën kundër korrupsionit, përforcim të sundimit të ligjit, si dhe institucione demokratike që mbrojnë të drejtat dhe liritë e njeriut dhe avancojnë demokracinë”, ka deklaruar ai.

Duke folur për situatën në veri, Konjufca ka thënë se Qeveria e Kosovës po punon për sigurinë dhe prosperitetin në të gjithë territorin, përfshirë zonat e banuara nga komunitetet joshumicë.

“Kemi mbyllur strukturat ilegale që operojnë nga Serbia, të cilat pengojnë integrimin etnik dhe cenojnë institucionet tona demokratike”, ka thënë ai, duke shtuar se mbyllja e tyre ofron siguri juridike dhe trajtim të drejtë për qytetarët.

Konjufca ka përmendur edhe bashkëpunimin e Policisë së Kosovës me KFOR-in dhe EULEX-in, si dhe hapjen e shërbimeve publike në komunat veriore, përfshirë kadastrin, regjistrimin e bizneseve, pensionet, zyrat e punësimit dhe administratën tatimore.

https://www.facebook.com/

https://www.facebook.com/watch/?v=1577469417028255