Xhelal Sveçla nxjerr videon: Radojçiq drejtoi grupin terrorist në Banjskë

September 26, 2023

Read Time:1 Minute, 13 Second

Grupi terrorist i serbëve që sulmoi policinë e Kosovës në fshatin Banjskë të Zveçanit, është drejtuar nga nënkryetari i Listës Serbe, Milan Radojçiq. Ky i fundit shihet edhe në videot që ka publikuar para pak çastesh, ministri i Punëve të Brendshme, Xhelala Sveçla, i cili thotë se nënkryetari i Listës Serbe është prijës i terroristëve që sulmuan policinë e Kosovës.

“Kryekrimineli Radojçiq ka qenë udhëheqës i këtij grupi terrorist dhe i sulmit ku mbeti i vrarë polici Afrim Bunjaku. Kjo është edhe një dëshmi tjetër mbi veprimtarinë e tij terroriste ndaj Republikës së Kosovës. Nënkryetari i Listës Serbe është prijës i sulmit terrorist dhe grupit të terroristëve”, ka deklaruar ministri Sveçla.

Harta e sulmit terrorist, sipas tij, po qartësohet çdo ditë.

“Aleksandër Vuçiq përmes Listës Serbe, dhe këta përmes nënkryetarit të tyre Radojçiq, kanë ndërmarrë veprimin terrorist kundër rendit juridik dhe kushtetues të Republikës së Kosovës duke tentuar të destabilizojnë Republikën tonë. Pra, Lista Serbe e sheh pjesëmarrjen e saj në Kosovë vetëm në mënyrë terroriste. Ata dështuan”, shkruan Sveçla.

Ndërkohë, ditët e zisë të shpallura sot nga Serbia dhe Lista Serbe, sipas ministrit të Punëve të Brendshme, janë tashmë vulosja e autorësisë së këtij organizimi.

“Ky në pamjet më poshtë është Milan Radojçiq, nënkryetar i Listës Serbe, po ashtu pjesë edhe e Listës së Zezë të ShBA-së dhe Mbretërisë së Bashkuar”, shkruan Sveçla në videon e publikuar që po e shfaqim edhe në RTKLive.

https://www.facebook.com/watch/?v=165918599893153