Albin Kurti falënderon Erdoganin për përkrahjen për anëtarësim në NATO dhe KE

Read Time:2 Minute, 36 Second

Turqia është e gatshme të ofrojë çdo mbështetje të mundshme për dialogun mes Kosovës e Serbisë, nëse i kërkohet një gjë e tillë.

Kështu ka deklaruar presidenti i Turqisë, Rexhep Taip Erdogan në konferencën e përbashkët për media pas takimit dy palësh me kryeministrin e Kosovës, Albin Kurtin.

E në anën tjetër, kryeministri Kurti ka falënderuar Turqinë për mbështetjen e vazhdueshme për Kosovën që nga roli i saj në ndërhyrjen e NATO-s e deri te përkrahja për anëtarësimin në Aleancën Veriatlantike dhe në Këshillin e Evropës.

“Sot, bashkë me Presidentin Erdogan biseduam për raportet miqësore që kemi dhe për mënyrat sesi mund t’i thellojmë e forcojmë me vullnetin e dyanshëm që e kemi. Folëm për mundësitë e reja të bashkëpunimit në rrafshin ekonomik e tregtar, të sigurisë e të mbrojtjes. Diskutuam edhe për zhvillimet në rajon dhe më gjerë”, tha Kurti duke shtuar se Kosova gjithmonë do të jetë mirënjohëse për rolin e Turqisë në intervenimin e NATO-s në Kosovë në vitin 1999 .

“Jemi gjithmonë mirënjohëse për rolin e Turqisë në intervenimin e NATO-s në Kosovë në vitin 1999, për ndaljen e gjenocidit mbi popullin e Kosovës e që solli çlirimin dhe paqen në vend; për kontributin e pakursyer në ndërtimin e institucioneve; shpalljen dhe njohjen e pavarësisë së Republikës sonë; dhe për mbështetjen e plotë e të pakursyer të Turqisë në politikën e jashtme”, tha Kurti.

Po ashtu Kurti tha ta ketë falënderuar presidentin Erdogan për përkrahjen e zëshme të Turqisë për anëtarësimin e Kosovës në NATO dhe në Këshill të Evropës.

“Në NATO na bashkon orientimi. Në Këshill të Evropës vlerat. Në të dyjat, na bashkon momenti kritik nëpër të cilin po kalon kontinenti i Evropës. Një nga synimet tona kryesore si Qeveri e Republikës së Kosovës, është krijimi i një mjedisi të favorshëm për të tërhequr investitorë të huaj, në mënyrë që të krijojmë ekonomi të qëndrueshme”, tha Kurti.

Turqia, tha Kurti, është ndër partnerët tonë kryesor ekonomik dhe tregtar.

“Kjo na gëzon, por nuk duhet të na mjaftojë. Le ta shfrytëzojmë aktualitetin e bashkëpunimit për ta arritur potencialitetin e madh të tij”, tha kreu i Qeverisë së Kosovës.

Nga ana tjetër, Presidenti i Turqisë, Recep Tayyip Erdogan, ka premtuar mbështetje për Kosovën në anëtarësimin në Këshillin e Evropës, Bashkimin Evropian dhe në NATO.

“Turqia është një nga vendet e para që e ka njohur Pavarësinë e Kosovës. Atë kohë, kam qenë duke drejtuar mbledhjen e kabinetit dhe ma komunikuan që SHBA-ja e kishte njohur si vendi i parë, dhe thashë se ne do të jemi vendi i dytë që e njohim Kosovën. Qoftë e hajrit. Është domethënëse kjo. Tani janë 117 shtete që e njohin’, tha Erdogan.

Tutje ka thënë ai se Turqia do të bëjë punë intensive që të arrijmë shifrën që është si objektiv sa i përket njohjeve.

“Dua t’iu uroj 15-vjetorin e Pavarësisë që tani. Ne po vazhdojmë përpjekjet për të siguruar që Kosova të arrijë pozicionin e merituar në arenën ndërkombëtare. Mbështesim Kosovën në anëtarësimin në Këshillin e Evropës, BE dhe NATO” , ka thënë Erdogan në konferencën e përbashkët me Kurtin.

https://www.facebook.com