PDK: Pranimi i propozimit evropian, mundësi të humbur për Kosovën

Read Time:1 Minute, 24 Second

Partia Demokratike e Kosovës e ka cilësuar si mundësi të humbur për Republikën e Kosovës pranimin e propozimit evropian nga ana e kryeministrit Albin Kurti.

Ky subjekt politik e sheh këtë dokument të pamjaftueshëm për arritjen e qëllimeve shtetërore të vendit tonë.

“Dje, përmes pranimit të propozimit evropian, fatkeqësisht, ndodhi ajo që PDK kishte paralajmëruar disa herë gjatë javëve dhe muajve të fundit. Kryeministri Kurti hoqi dorë nga qëndrimet dhe kushtet e tij para interesave personale dhe ambicieve për të qëndruar në pushtet. Ndërkaq, si rrjedhojë, Kosova humbi njohjen e ndërsjellë me Serbinë, ndërsa fitoi Asociacionin e Komunave me shumicë serbe”, thuhet në komunikatën e PDK-së pas mbledhjes së sotme të kryesisë.

Sipas PDK-së “në propozimin zyrtar nuk flitet për njohjen nga pesë vendet mos-njohëse të BE-së, nuk flitet për hapjen e rrugës drejt anëtarësimit në NATO, as për marrjen e statusit kandidat për anëtarësim në BE”.

“Përkundrazi, aty flitet për kompetenca të zgjeruara për komunitetin serb, që rrezikojnë të qojnë drejt autonomisë substanciale dhe, po ashtu, flitet për statusin e veçantë për Kishën Ortodokse Serbe në Kosovë, që rrezikon të qojë drejt ekstra-territorialitetit. Për dy vjet me radhë, Partia Demokratike e Kosovës e ka mbështetur kryeministrin Kurti në raport me Serbinë. PDK e ka inkurajuar që të koordinohet me aleatët tanë ndërkombëtarë dhe i ka ofruar edhe propozime konkrete në lidhje me marrëveshjen finale me njohjen e ndërsjellë në qendër. Për fat të keq, kryeministri Kurti injoroi çdo ndihmë e këshillë që i është dhënë dhe kokë më vete e në kundërshtim me interesat afatgjate të Republikës së Kosovës, përmes veprimeve dhe politikave të gabuara, degradoi pakthyeshëm procesin e dialogut”, thuhet tutje në komunikatë.