Senatorët amerikan letër Blinkenit: Të zgjidhet çështja e Luginës së Preshevës
Dy senatorët amerikanë, Joni K. Ernst dhe Gary C. Peters, i kanë shkruar letër sekretarit të SHBA-së, Antony Blinken, ku kanë thënë se Serbia po i diskriminon shqiptarët në Luginën e Preshevës dhe kanë kërkuar që të hapet tema e çështjes së shqiptarëve në Luginë, në secilin komunikim apo takim me autoritetet serbe.
Në letër, gjithashtu kërkohet realizimi i planit shtatë-pikësh për të drejtat shqiptare në Luginë, i pranuar edhe nga Serbia që në vitin 2013.
Për këtë ka reaguar Ardita Sinani, këshilltare politike e kryeministrit të Republikës së Kosovës për Preshevë, Medvegjë dhe Bujanoc, e cila reagimin e senatorëve e konsideron shumë të rëndësishme për shqiptarët në Luginë.
“Në letrën drejtuar Sekretarit të Shtetit të SHBA-ve, kërkohet që çështja e shqiptarëve të Luginës të trajtohet në secilin komunikim apo takim me autoritetet serbe. Aty potencohen faktet e diskriminimit shtetëror nga ana e Serbisë ndaj shqiptarëve në Luginë, me theks të veçantë pasivizimin e adresave, si metodë administrative e spastrimit etnik. Po ashtu kërkohet realizimi i Planit Shtatëpikësh i miratuar nga ana e qeverisë së Serbisë më 4 qershor 2013”, shkruan Sinani.
Sipas senatorëve, ky plan është rruga diplomatike, zgjidhja e drejtë e kërkesave legjitime të shqiptarëve etnik në Luginë të Preshevës, është çelësi për stabilitet dhe paqe të qëndrueshme dhe afatgjate në rajon.
