Medvegjë: Ardita Sinani njofton ambasadat perëmdimore dhe OSBE-në për parregullsitë në registrimin e popullatës
Dje, Këshilltarja Politike e kryeministrit të Republikës së Kosovës për Luginë të Preshevës, shkoi për të parë nga afër procesin e regjistrimit të popullsisë e pasurive në komunën e Medvegjës
Për rëndësinë jetike që ka regjistrimi i popullsisë për shqiptarët në Luginën e Preshevës në përgjithësi, e për Medvegjën në veçanti, këshilltarja Politike e kryeministrit Kurti, znj. Ardita Sinani qëndroi për vizitë një ditore për të motivuar shqiptarët e kësaj komune që t’i përgjigjen masivisht regjistrimit.
Gjatë vizitës, znj. Sinani takoi qytetarë nga diaspora e Kosova, që kishin ardhur enkas për t’u regjistruar.
Poashtu, Ardita Sinani takoi edhe përfaqësues politik e lokal të komunës së Medvegjës, si dhe përfaqësuesen zyrës së Këshillit Kombëtar Shqiptar në Medvegjë.
Por zonja Sinani ka vërejtur se politika shtetërore e Republikës së Serbisë në Medvegjë po rrezikon ta komprometoj procesin e regjistrimit të shqiptarëve në Serbi.
“Tash që jemi gati në mesin e procesit, për komunën e Medvegjës janë vetëm 3 regjistrues shqiptarë.
Madje ata janë caktuar nga Enti i Statistikave në vendbanimet me shumicë serbe.
Ftoj autoritet përgjegjëse të Republikës së Serbisë që ta sanojnë urgjentisht këtë situatë.
Për këto parregullsi dhe pengesa kam filluar njëkohësisht kontaktet me OSBE, ambasadat perëndimore në Beograd, si dhe Qeverinë e Republikës së Kosovës dhe Shqipërisë” ka deklaruar Ardita Sinani
