Deputetja serbe Paunoviq: Urgjentisht shteti serb të arrestojë Shaip Kamberin ose ta shpërngulim nga këtu

Read Time:1 Minute, 19 Second

Deputetja e Partisë Socialiste të Sllobodan Millosheviqit, Snezhana Paunoviq, në foltoren e parlamentit serbe tha se është nga Kosova por që është detyruar të shpërngulet nga terrori i shqiptarëve dhe tani jeton në Serbi dhe se shteti serb duhet ta arrestojë urgjentisht Shaip Kamberin, e nëse kjo nuk është e mundur atëherë ta shpërngulim nga këtu. Ajo gjithashtu mbrojti edhe veprimet e ish kryetarit të saj, Kasapit të Ballkanit, Sllobodan Millosheviq dhe deklaroi se “unë jam shumë më ekstreme se Millosheviqi”

Problemin më të madh ajo e shfaqi me deputetin shqiptarë Shaip Kamberin për të cilin tha se duhet të arrestohet ose të shpërngulet njejtë sikur që qenka shpërngulur ajo nga Kosova.

“Na kujtohet mirë gabimi që kemi bërë kur e kemi liruar nga burgu Albin Kurtin, kam frikë se po e përsërisim të njejtin gabim që mos ta arrestojmë Shaip Kamberin i cili dje cenoi rëndë kushtetutën tonë duke thënë se Kosova është e pavarur. dhe Kamberi flet këtu në emër të mentorit të tij e që është Albin Kurti” deklaroi deputetja Snezhana Paunoviq.

Ajo vazhdoi edhe më tutje me kërcënime dhe ofendime ndaj kryetarit të PVD-së dhe deputetin Shaip Kamberi.

“Kamberit po i duket vetja se është udhëheqës i shqiptarëve në jug të Serbisë, por ai duhet ta shoh veten në pasqyrë dhe të shërohet. Nëse nuk gjen shërim në Kosovë do ta shërojmë ne në Serbi sepse nuk do të jetë shiptari i parë që ne e shërojmë. Mos të lejojmë që pas disa viteve të na brejë ndërgjegja pse nuk e arrestuam sot Kamberin”.